سەناتور رىسقالي ابدىكەروۆ ەلىمىز پرەمەر- ءمينيسترى ءاليحان سمايىلوۆتىڭ اتىنا جولداعان دەپۋتاتتىق ساۋالىندا وسى ماسەلەلەردى اتادى، دەپ حابارلايدى قازاقپارات ءتىلشىسى.
دەپۋتات حالىقارالىق قانت ديابەتى فەدەراتسياسىنىڭ مالىمەتى بويىنشا بىلتىر الەمدە ەرەسەكتەر اراسىندا 537 ميلليون قانت ديابەتى سىرقاتىنىڭ تىركەلگەنىن اتاپ ءوتتى. قازاقستاندا بۇل كورسەتكىش شامامەن 450 مىڭ ادامدى قۇرايدى. ونىڭ ىشىندە 5,5 مىڭعا جۋىعى 17 جاسقا دەيىنگى بالالار بولىپ وتىر.
«ەلىمىزدە اۋىر دەرتكە شالدىققاندار سانى ودان دا كوپ بولۋى مۇمكىن. سەبەبى، اتالمىش دەرت كوپكە دەيىن بەلگى بەرمەيتىندىكتەن، ناۋقاستاردىڭ كوبىسى اسقىنعان كەزدە عانا دارىگەرگە جۇگىنەدى. ارينە، ءبىزدىڭ ەلىمىزدە وسىنداي ناۋقاستار ەمدەلۋ ءۇشىن امبۋلاتوريالىق دەڭگەيدە قانتتى تومەندەتەتىن دارىلىك زاتتارمەن، مەديتسينالىق زاتتارمەن قامتاماسىز ەتىلەدى. سونىمەن قاتار، بۇگىنگى تاڭدا قانت ديابەتى - قازاقستانداعى ەڭ قىمبات الەۋمەتتىك ماڭىزى بار اۋرۋلاردىڭ ءبىرى. رەسمي اقپارات بويىنشا، ناۋقاستاردى ءدارى- دارمەكپەن قامتاماسىز ەتۋ ءۇشىن بيىل 30 ميلليارد تەڭگەگە جۋىق قاراجات بولىنگەن»، - دەدى سەناتور.
دەپۋتاتتىڭ ايتۋىنشا، ەل وڭىرلەرىندە ەندوكرينولوگ- دارىگەرلەردىڭ جەتىسپەۋشىلىگى دە وزەكتى ماسەلە بولىپ وتىر. قازىرگى كەزدە قازاقستاندا جەكە سەكتوردا جۇمىس ىستەيتىندەردى قوسقاندا 900 دەن استام وسىنداي مامان بار ەكەنىن ايتا كەتكەن ءجون.
«ۇكىمەت جوعارىدا ايتىلعان ماسەلەلەردى ەسكەرە وتىرىپ، قانت ديابەتىمەن ءتيىمدى كۇرەسۋ ءۇشىن باستاپقى پروفيلاكتيكا مەن پاتولوگيانى ەرتە انىقتاۋعا باعىتتالعان قانت ديابەتى بويىنشا ۇلتتىق باعدارلامانى ازىرلەۋدى سۇرايمىن. وعان كەلەسى باعىتتاردى قوسۋدى ۇسىنامىن: قازاقستاندا مامانداندىرىلعان ديابەتتىك كومەك كورسەتۋدىڭ زاماناۋي جۇيەسىن قۇرۋ، كورسەتىلەتىن كومەكتىڭ ساپاسىن ارتتىرۋ ماقساتىندا دياگنوستيكانىڭ جانە ەمدەۋدىڭ زاماناۋي ادىستەمەلەرىن ەنگىزۋ، جۇكتىلىك كەزىندە انا مەن بالا ءولىمىن ازايتۋ ءۇشىن قانت ديابەتىن ۋاقىتىلى جانە دەر كەزىندە ەمدەۋ كەرەك»، - دەدى سەناتور.