الاياقتار قانداي قۋلىقتارعا بارادى؟
الاياقتار ساتىپ الۋشىلاردى كوبىنەسە ۇلكەن «مەرەكەلىك جەڭىلدىكتەرمەن»، اكسيالارمەن، سىيلىقتارمەن قىزىقتىرادى. جەلىدە تاراتاتىن جارنامالارىندا، سونداي-اق، ەلەكترون پوشتا مەن مەسسەندجەرلەر ارقىلى الاياقتار «جاپپاي ساتىلىم»، «90 پايىزعا دەيىن جەڭىلدىك»، «بۇرىن-سوڭدى بولماعان ۇسىنىس»، «ەسكى جىلداعى مۇمكىندىك» دەگەن سوزدەردى قولدانادى. الاياقتار رەسۋرستارىندا «اكسيانىڭ» اياقتالۋىنا دەيىن قالعان ۋاقىتتى كورسەتەتىن ءتۇرلى ەسەپتەگىشتەردى ءجيى قولدانادى.
الاياقتاردىڭ «ساتاتىن» تاۋارلارىنىڭ ىشىندە - شىرشالار، جاڭاجىلدىق اتريبۋتيكا، ەلەكترتەحنيكاسى، كيىم-كەشەك، اياق كيىم، تاعامعا بەلسەندى قوسپالار جانە تاعى باسقا كوپ تاۋار بار.
تۇتىنۋشىلاردىڭ سەنىمىنە كىرۋ ءۇشىن قاسكۇنەمدەر تانىمال الەۋمەتتىك جەلىلەردە پايدالانۋشىلاردىڭ سۇراقتارىنا جاۋاپ بەرىپ، پاراقشاسىن بەلسەندى جۇرگىزەدى. شىن مانىسىندە الاياقتار ەشتەڭە «ساتپايدى»، ولاردىڭ ماقساتى - وزدەرىنىڭ الەۋەتتى قۇرباندارىنىڭ دەربەس جانە تولەم دەرەكتەرىنە يە بولۋ.
الدانىپ قالماڭىز
قىزىعۋشىلىق تانىتقان ساتىپ الۋشىلار ونلاين تاپسىرىس بەرۋ تۋرالى شەشىم قابىلداپ، فيشينگ بەتكە تۇسەدى. ەگەر ولار تاڭداعان تاۋارلارىنا اقى تولەۋ ءۇشىن ءوز كارتوچكالارىنىڭ دەرەكتەرىن ەنگىزسە، الاياقتار ولاردان بارلىق اقشانى ەسەبىنەن شەشىپ الادى.
ەسىڭىزدە بولسىن! بانك كارتاسىنىڭ ارتقى جاعىنداعى ءۇش تاڭبالى كود جانە قولدانىس مەرزىمى، تولىق دەرەك - بۇل قۇپيا مالىمەتتەر جانە ولاردى الاياقتارعا ءوز ەركىمەن بەرگەنىڭىز اقشاڭىزدى قايتارۋ مۇمكىن ەمەس دەگەندى بىلدىرەدى.
ونلاين-ساۋدا جاساماس بۇرىن، كيبەرقاۋىپسىزدىك ەرەجەلەرىن ەستەن شىعارماۋ قاجەت، الاياقتاردىڭ پسيحولوگيالىق ايلا-شارعىلارىنا بەرىلمەۋ كەرەك.
ءبىرىنشى كەزەكتە، مەكەنجاي جولاعىندا سايتتىڭ اتاۋىن مۇقيات تەكسەرىڭىز. ەگەر سىزگە تانىمال برەندتەن e-mail پوشتاعا نەمەسە SMS-حابارلاما ارقىلى تارتىمدى ۇسىنىس كەلىپ تۇسسە، سىزگە جىبەرىلگەن سىلتەمەگە وتپەڭىز.
ونلاين-شوپينگ جاساماس بۇرىن سايتتىڭ شىنىمەن ينتەرنەت- دۇكەنگە تيەسىلى ەكەنىنە كوز جەتكىزىڭىز. كومپانيانىڭ رەسمي سايتىن قولمەن تەرىپ، سەنىم تەلەفونىنا قوڭىراۋ شالىپ، قولدانىستاعى ساتىلىمدار نەمەسە ۇتىس جۇلدەلەر جونىندەگى اقپاراتتى ناقتىلاعانىڭىز دۇرىس. سونداي-اق، تەك ينتەرنەتتە ساتىپ الۋلارعا ارنالعان جەكە كارتا رەسىمدەپ العانىڭىز دۇرىس بولادى.
تەلەفون ارقىلى جاسالاتىن الاياقتىق
قاسكۇنەمدەر زاماناۋي تەحنولوگيالاردى قولدانادى. ەگەر ءسىز كۇماندى سىلتەمە بويىنشا ءوتىپ، فيشينگ بەتكە كىرسەڭىز، ءبىراق ونى دەر كەزىندە جاۋىپ ۇلگەرسەڭىز دە، ءسىزدىڭ IP-ىڭىز ساقتالىپ قالادى. نەمەسە ەگەر ءسىزدىڭ بايلانىس دەرەكتەرىڭىز الاياق رەسۋرستاردا قالىپ كەتسە، بەيتانىس ادامداردىڭ قوڭىراۋلارعا دايىن بولىڭىز، ولار وزدەرىن قىزىقتىراتىن اقپاراتتى الۋ ءۇشىن ءتۇرلى سىلتاۋلار ىزدەيدى.
الاياقتار وزدەرىن دۇكەندەردىڭ، بانكتەردىڭ، قۇقىق قورعاۋ ورگاندارىنىڭ قاۋىپسىزدىك قىزمەتكەرلەرى رەتىندە تانىستىرۋى مۇمكىن.
ءوز قاراجاتىن ساقتاۋ ءۇشىن الاياقتار، ادەتتە، ازاماتتارعا اقشانى «قاۋىپسىز» شوتقا اۋدارۋدى ۇسىنادى. بۇل رەتتە الاياقتار ءوز قۇرباندارىنا اقپاراتتى تەكسەرۋگە جانە ويلانۋعا ۋاقىت بەرمەيدى. شەشىم ءدال وسى جەردە جانە ءقازىر قابىلدانۋى كەرەك. ەگەر ءسىز دەرەۋ اقشا اۋدارماساڭىز نەمەسە كارتا دەرەگىن ايتپاساڭىز، وندا شوتتاعى اقشا جوعالادى، سىيلىق باسقاعا بەرىلەدى نەمەسە قارجى ۇيىمىنىڭ ۇسىنىسى وزەكتىلىگىن جوعالتادى.
ەسىڭىزدە بولسىن! بانكتەر ەشقاشان تەلەفون ارقىلى كليەنتتەردىڭ تولەم كارتالارىنىڭ دەرەكتەرىن سۇرامايدى. بانكتەردە قىزمەتكەرلەردىڭ ءىس-قيمىل رەگلامەنتى بار، وعان سايكەس ولار ەشقاشان مۇنداي ماسەلەلەر بويىنشا ءوز كليەنتتەرىنە ءبىرىنشى بولىپ قوڭىراۋ شالمايدى.