قازاقستاننان دۋبايعا بيلەتتەر ارزانداپ، ۇشاق سانى ارتادى - مينيسترلىك

استانا. قازاقپارات - جاڭاجىلدىق مەرەكە جانە وقۋشىلاردىڭ قىسقى كانيكۋلى كەزىندە قازاقستاننان بىرىككەن اراب امىرلىكتەرىنە (ب ا ءا) ۇشاقتار سانى ارتىپ، سايكەسىنشە بيلەتتەر قۇنى ارزانداماق، دەپ حابارلايدى قازاقپارات.

«ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتى ب ا ءا- ءنىڭ اۆياتسيا بيلىگىمەن بىرلەسىپ، مەرەكە كۇندەرى جانە كانيكۋل كەزەڭىندە اۆيابيلەتتەردىڭ قۇنىن تومەندەتۋ ماقساتىندا ب ا ءا-گە رەيستەر سانىن ارتتىرۋ شەشىمىن قابىلدادى»، - دەلىنگەن مينيسترلىك مالىمەتىندە.

اتاپ ايتقاندا، 29-جەلتوقساننان باستاپ 2023 -جىلعى 14-قاڭتارعا دەيىن «Fly Dubai» اۋەكومپانياسى استانا - دۋباي جانە الماتى - دۋباي باعىتتارى بويىنشا قوسىمشا 10 رەيستى ورىنداۋدى جوسپارلاپ وتىر. رەيستەر ب-737 ءتيپتى اۋە كەمەلەرىندە ورىندالاتىن بولادى.

«رەيستەر سانىنىڭ ارتۋى ق ر مەن ب ا ءا اراسىنداعى ساۋدا- ەكونوميكالىق ىنتىماقتاستىقتى ودان ءارى دامىتۋعا ىقپال ەتەتىنىن اتاپ ءوتۋ ماڭىزدى»، - دەيدى ۆەدومستۆودان.