«ۇزدىك اشىق اكىم» بولىپ قاراعاندى وبلىسى نۇرا اۋدانى بارشىن اۋىلدىق وكرۋگىنىڭ اكىمى زاۋرە مۇحاناليەۆا تانىلدى، دەپ حابارلايدى قازاقپارات ءتىلشىسى.
جارىس ەكى كەزەڭ بويىنشا ءوتتى: ايماقتىق جانە رەسپۋبليكالىق.
«وڭىرلىك كەزەڭگە قاتىسۋشىلار حالىقتىڭ اۋىلدىق جەردە تۇرۋىنا قولايلى جاعداي جاساۋعا باعىتتالعان جوبالارىن قورعادى، ەكونوميكالىق جانە الەۋمەتتىك الەۋەتى بار اۋىلداردى تۇراقتى دامىتۋ جونىندە ۇسىنىستار ەنگىزدى.
ەكىنشى كەزەڭدە اۋىل اكىمدەرىنىڭ سيتۋاتسيالىق كەيستەر ارقىلى پروبلەمالىق جاعدايلار بويىنشا تاجىريبەلىك مىندەتتەردى شەشۋ قابىلەتى باعالاندى»، — دەپ حابارلادى ق ر مەملەكەتتىك قىزمەت ىستەرى اگەنتتىگى.
زاۋرە مۇحاناليەۆا 2016-جىلدان بەرى بارشىن اۋىلدىق وكرۋگىنىڭ اكىمى بولىپ جۇمىس ىستەيدى.
«كەلەسى جىلى مەن زەينەتكە شىعامىن. ءسىزدىڭ جۇمىسقا قالاي كەلگەنىڭىز ەمەس، ودان قالاي كەتەتىنىڭىز ماڭىزدى دەگەن ءسوز بار. وبلىستىق دەڭگەيدە «تەرى يلەۋ جانە ءجۇن وڭدەۋ» تاقىرىبىندا ءوز جوبامدى قورعادىم. ال رەسپۋبليكالىق كەزەڭگە ءبىز ونلاين قاتىسىپ، كەيستەر بويىنشا سۇراقتارعا جاۋاپ بەردىك. ءاليحان بوكەيحانوۆ: حالىققا قىزمەت ەتۋ بىلىمدە ەمەس، مىنەزدە دەگەن. مەنىڭ مىنەزىم اشىق، كوپشىلمىن.
بۇل قاسيەتتەر ماعان تۇرعىندارمەن جۇمىس ىستەۋدە كوپ كومەكتەسەدى. بىزدە 803 ادام تۇرادى. اكىمدەر حالىق اراسىندا جانە حالىقپەن جۇمىس ىستەۋى ءتيىس. ادامدارمەن ورتاق ءتىل تابىسۋ ءۇشىن بەلگىلى ءبىر دارەجەدە پسيحولوگ بولۋىڭىز كەرەك. بولاشاق جاس اكىمدەر وسىنى ەسكەرەدى دەپ سەنەمىن»، — دەيدى زاۋرە مۇحاناليەۆا.
كونكۋرسقا بارلىعى جۇزگە جۋىق اۋىل جانە اۋىلدىق وكرۋگ باسشىلارى قاتىستى.
تۇركىستان وبلىسى شاردارا اۋدانى جاۋشىقۇم اۋىلدىق وكرۋگىنىڭ باسشىسى نۇرباقىت نۇرسەيتوۆ ۇزدىك اكىم اتاندى.
كونكۋرس جەڭىمپازدارى مەن نوميناتسيا يەگەرلەرى مەملەكەتتىك قىزمەت ىستەرى اگەنتتىگى ءتوراعاسىنىڭ قۇرمەت گراموتالارىمەن ماراپاتتالدى.