«بۇل اسا ماڭىزدى قۇجات ازاماتتاردىڭ ومىرىندەگى، ياعني ادامنىڭ تۋعاننان باستاپ قارتايعانعا دەيىنگى بازالىق الەۋمەتتىك قۇقىقتارىن بەلگىلەيدى. ول ءبىرىنشى كەزەكتە حالىقتىڭ تۇرمىس ساپاسىن جاقسارتۋعا باعىتتالعان. مۇنى ىسكە اسىرۋ ءۇشىن قولدانىستاعى نورماتيۆتىك بازانى قايتا قاراۋىمىز كەرەك. كودەكس قابىلدانعان سوڭ جاڭا الەۋمەتتىك ساياسات ءوتىنىش بەرۋ فورماسىنان پرواكتيۆتى فورماتقا كوشۋ كەرەك. ول وتباسىنىڭ تسيفرلىق كارتاسىن ەنگىزۋ ارقىلى جۇزەگە اسىرىلادى»، - دەدى وتىرىس بارىسىندا پرەمەر- مينيستر ءاليحان سمايىلوۆ.
ۇكىمەت باسشىسىنىڭ اتاپ وتۋىنشە، جوبانىڭ پيلوتتىق نۇسقاسى قىركۇيەكتەن بەرى ءبىرقاتار قىزمەت بويىنشا جۇمىس ىستەپ تۇر جانە ءقازىردىڭ وزىندە تيىمدىلىگىن كورسەتتى. الەۋمەتتىك قولداۋ الۋ قاجەتتىلىگى تسيفرلىق كارتا شەڭبەرىندە اقپاراتتىق جۇيە ارقىلى ايقىندالادى.
«دەمەك، ازاماتتار ءتيىستى ورگاندارعا جۇگىنبەي- اق، مەملەكەتتىڭ قولداۋىن الۋ مۇمكىندىگىنە يە بولادى. مەملەكەت بۇل قاجەتتىلىكتى ءوزى انىقتايدى جانە بارلىق راسىمدەردى اۆتوماتتى تۇردە جۇرگىزەدى. الەۋمەتتىك كودەكس جوباسىندا مۇگەدەكتىگى بار ادامدارعا كوپ كوڭىل بولىنگەن. ارناۋلى الەۋمەتتىك قىزمەتتەر جۇيەسىن جاڭعىرتۋ كوزدەلگەن»، - دەدى ول.
سونىمەن قاتار، ۇكىمەت باسشىسى جۇمىسپەن قامتۋدىڭ بارلىق يكەمدى تۇرلەرىن، ونىڭ ىشىندە «پلاتفورمالىق» جۇمىسپەن قامتۋدى زاڭنامالىق تۇرعىدان ايقىنداۋ جانە بەكىتۋ جوسپارلانىپ وتىرعانىن ايتتى.
«باستى مىندەت - ازاماتتاردىڭ وسى ساناتتارىن الەۋمەتتىك قامسىزداندىرۋ جۇيەسىمەن قامتۋ. سونداي- اق، الەۋمەتتىك كودەكس جوباسىندا ۇلتتىق بىلىكتىلىك جۇيەسىن دامىتۋ جانە سەرتيفيكاتتاۋ جۇيەسىن ەنگىزۋ كوزدەلىپ وتىر. ولار جاستاردىڭ جۇمىسقا تۇرۋىنا كەدەرگى بولاتىن ارتىق تالاپتاردى الىپ تاستاۋعا مۇمكىندىك بەرەدى. كودەكس پارلامەنتتىڭ قاراۋىندا بولعانمەن، جەكەلەگەن الەۋمەتتىك شارالار 2023 -جىلدان باستاپ ىسكە اسىرىلادى. ايتالىق، كەلەسى جىلدىڭ باسىنان باستاپ بالا كۇتىمى بويىنشا تولەمدەر 1 جاستان 1,5 جاسقا دەيىن ۇزارتىلادى. الەۋمەتتىك ساقتاندىرۋ جۇيەسىنە قاتىسۋشىلار ءۇشىن جۇمىسىنان ايىرىلعان كەزدە تولەنەتىن تولەمدەر ورتاشا ايلىق تابىستىڭ 45 پايىزعا دەيىن ۇلعايادى»، - دەدى ءاليحان سمايىلوۆ.
جالپى، كودەكستە ۇسىنىلعان شارالار الەۋمەتتىك قورعاۋ جۇيەسىن وزگەرتۋگە جانە وسى سالادا بولىپ جاتقان وزگەرىستەردەن وڭ ناتيجە الۋعا مۇمكىندىك بەرەدى.
پرەمەر- مينيستر الەۋمەتتىك كودەكس جوباسىن قابىلداۋ ءۇشىن داۋىس بەرۋدى ۇسىنىپ، ونى ۇكىمەت مۇشەلەرى ءبىراۋىزدان قولدادى. «ەڭبەك مينيسترلىگى پرەمەر- مينيستر كەڭسەسىمەن بىرلەسىپ، جوبانى پارلامەنت ماجىلىسىنە ۋاقتىلى ەنگىزۋدى قامتاماسىز ەتسىن»، - دەدى ۇكىمەت باسشىسى.
اۆتور
مارلان جيەمباي