بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا حالىقارالىق شاحمات فەدەراتسياسىنىڭ (ف ي د ە) پرەزيدەنتى اركادي دۆوركوۆيچ ءمالىم ەتتى، دەپ حابارلايدى قازاقپارات ءتىلشىسى.
«ءبىز قازاقستاندا ءبىرىنشى رەت جارىس وتكىزىپ وتىرعان جوقپىز. بۇل - قوناقجاي ەل. مۇندا الەمنىڭ ۇزدىك ويىنشىلارىنا بارلىق قاجەتتى جاعداي جاسالعان. قازاقستاندا ايەلدەر اراسىنداعى ف ي د ە گران-ءپريىنىڭ كەزەڭى ءوتتى، سونىمەن قاتار اقتوبەدە مەنىڭ اكەمدى ەسكە الۋعا ارنالعان «ۆلاديمير دۆوركوۆيچ مەموريالى» حالىقارالىق شاحمات فەستيۆالى ءوتتى. سونىمەن قاتار، ارينە، ءبىز الداعى تۋرنيرلەردى، سونىڭ ىشىندە بالالار تۋرنيرلەرىن وتكىزۋ جايىن تالقىلاپ جاتىرمىز. ەل پرەزيدەنتىنە، ۇكىمەتكە جانە ءبىزدىڭ سەرىكتەستەرگە كورسەتىپ جاتقان قولداۋى ءۇشىن العىس ايتقىم كەلەدى»، - دەدى ا. دۆوركوۆيچ.
سپيكەر ءوتىپ بارا جاتقان جىلدىڭ قيىن، ءارى وتە ءساتتى بولعانىن اتاپ ءوتتى.
«ءۇندى دوستارىمىزدىڭ ارقاسىندا ءبىز وليمپيادانى ۇيىمداستىرۋعا قول جەتكىزدىك، قىركۇيەكتەن قاراشاعا دەيىن بار بولعانى ءۇش ايدىڭ ىشىندە وتكەن جىلداردان بەرى كەيىنگە قالدىرىلعان وننان استام الەم چەمپيوناتىن وتكىزدىك. 2022-جىلى شاحماتتىڭ كلاسسيكالىق تاقتادا دا، ونلاين رەجيمدە دە تانىمالدىلىعىن ارتتىرۋعا قول جەتكىزدىك. جۇلدە قورىنىڭ ءوسىپ كەلە جاتقانىن كورىپ وتىرمىز، ءبىز ايەلدەر شاحماتى جىلىن وتكىزدىك جانە كوپ تۋرنيرلەر، وقۋ-جاتتىعۋ پروتسەستەرى كوپ بولدى، ۇيىمداستىرۋشى، مەنەدجەر جانە تورەشى رەتىندە ايەلدەردىڭ كوپ بولۋىنا قول جەتكىزە الدىق. بۇل ايەلدەر شاحماتىنىڭ الداعى ون جىلىنا جاقسى باستاماسى دەپ سەنەمىز»، - دەدى ول.
سونىمەن قاتار، حالىقارالىق شاحمات فەدەراتسياسىنىڭ پرەزيدەنتى اركاديي دۆوركوۆيچ باستى جەتىستىك - كوپتەگەن ەلدەردە جۇزەگە اسىرىلىپ جاتقان «مەكتەپتەگى شاحمات» جوباسى ەكەنىن ەسكە سالدى. قازاقستان - شاحماتتى ءبىلىم بەرۋ باعدارلاماسىنا ەنگىزگەن ەلدىڭ ءبىرى.
ايتا كەتەيىك، الماتىداعى بالۋان شولاق اتىنداعى سپورت جانە مادەنيەت سارايىندا شاحماتتىڭ راپيد جانە بليتس تۇرىنەن الەم چەمپيوناتى ءوتىپ جاتىر.
جاھاندىق دوداعا 50 ەلدىڭ ۇزدىك 290 شاحماتشىسى قاتىسادى. اشىق تۋرنيرگە 176 ويىنشى قاتىسادى. سايىستىڭ فاۆوريتى سوڭعى 10 جىلداعى الەم چەمپيونى ماگنۋس كارلسەن (نورۆەگيا).
ايەلدەر تۋرنيرىندە 100 دەن استام سپورتشى باق سىنايدى. قازاقستاننىڭ نامىسىن الەمگە ايگىلى شاحماتشىلار جانسايا ابدىمالىك پەن ءبيبىسارا اساۋبايەۆا قورعايدى.