ول قازاقستاننىڭ كوپقىرلى جانە تەڭدەستىرىلگەن سىرتقى ساياساتتى ۇستاناتىنىن اتاپ ءوتتى، دەپ حابارلايدى قازاقپارات.
سىرتقى ىستەر ءمينيسترى سۇحباتتا رەسەي مەن ۋكراينانىڭ تاريحي تۇرعىدان قازاقستانعا تاتۋلاس ەلدەر ەكەنىن ايتتى.
«مەنى ۋكرايناداعى شيەلەنىس قاتتى الاڭداتادى. قازاقستان ءۇشىن رەسەي مەن ۋكراينا - تاريحي تۇرعىداعى تاتۋلاس ەلدەر. قازاقستان پرەزيدەنتى قاسىم-جومارت توقايەۆ ەكى مەملەكەتتىڭ دە باسشىلارىمەن ۇنەمى بايلانىستا جانە ولاردى كەلىسسوز ۇستەلىنە وتىرۋعا، داۋدى شەشۋدىڭ بەيبىت جانە ديپلوماتيالىق جولىن تابۋعا شاقىرۋدا»، - دەپ اتاپ ءوتتى ق ر سىرتقى ىستەر ءمينيسترى.
ول ەكونوميكالىق تۇرعىدان رەسەي مەن قازاقستاننىڭ تىعىز بايلانىستا ەكەنىن جانە رەسەي فەدەراتسياسىنا قارسى سانكسيالار قازاقستان ەكونوميكاسىنا كەرى اسەرىن تيگىزگەنىن ايرىقشا اتاپ ءوتتى.
«قازاقستان رەسەيگە قارسى سانكتسيالارعا قاتىسپايدى، ءبىراق سانكسيالاردى اينالىپ وتەتىن ءتۇرلى مۇمكىندىكتەردى پايدالانبايدى دەگەن قاعيدانى ۇستانادى. قازاقستان كوپقىرلى سالماقتى ديپلوماتيانى جۇرگىزەدى. ءبىز رەسەيمەن، قىتايمەن، ورتالىق ازياداعى كورشىلەرىمىزبەن، سونداي-اق ا ق ش، جاپونيا، ەۋروپا ەلدەرى، ۇلى بريتانيا سياقتى الەمدىك دەرجاۆالارمەن ءوزارا ءتيىمدى جانە تەڭ قۇقىقتى قاتىناستاردى دامىتۋعا تىرىسامىز. بۇل بىزگە بارلىق ەلدەردەن ينۆەستيتسيا تارتۋعا مۇمكىندىك بەرەدى»، - دەيدى مۇحتار تىلەۋبەردى.
اسىرەسە، قازاقستاننىڭ كولىك جانە لوگيستيكا ءۇشىن ترانزيتتىك پۋنكت رەتىندە دامۋ الەۋەتىنە ەرەكشە كوڭىل ءبولىنىپ وتىر. ءمينيستردىڭ پىكىرىنشە، قازاقستان شەتەلدىك ينۆەستيتسيالاردى تارتىپ، ەۋروپا مەن ازيانى بايلانىستىراتىن حاب بولا الادى.
«بيىل قازاقستان مەن جاپونيا اراسىندا ديپلوماتيالىق قاتىناستار ورناعانىنا 30 جىل تولادى. ءبىز سوڭعى جىلدارى قارىم-قاتىناستاردىڭ جوعارى دەڭگەيىنە قول جەتكىزدىك جانە پارلامەنتتىك دوستىق اياسىندا بۇل قاتىناستاردى ستراتەگيالىق ارىپتەستىك دەپ سانايمىز»، - دەپ تۇيىندەدى مينيستر م. تىلەۋبەردى.
ايتا كەتەيىك، قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى «ورتالىق ازيا - جاپونيا» ديالوگىنىڭ سىرتقى ىستەر مينيسترلەرىنىڭ 9-كەڭەسىنە قاتىسۋ ءۇشىن توكيوعا ساپارمەن باردى.