ءوزىنىڭ پاك سەزىمگە دەگەن سەنىمىن مويىنداۋدى قور سانايدى. باۋىر باسا باستاعان ادامىنا ەموتسيالىق تۇرعىدان قولجەتىمسىز بولۋعا تىرىسىپ، ەسىك قاققان باقىتتىڭ كەۋدەسىنەن نەگە يتەرەدى؟ نارتسيسسيزم قالاي پايدا بولادى؟
جوعارىداعى سۇراقتاردى وقىپ «راس، ماعان وسىندايلار جولىققان» دەپ ەسكى دەرتىڭىزدى ەسكە العان شىعارسىز. ويلانىپ كورىڭىز. مۇندايلار قاتارىندا بالكىم ءسىز دە بار شىعارسىز. سەبەبى، ءسىز دە جۇرەكسىزدەر عاسىرىنىڭ ءبىر وكىلىسىز. ال، جۇرەكسىزدىك جۇقپالى.
اق تاڭداردا اڭقىلداپ سىر اقتارۋدان جۇرەكسىنەتىندەر ادەتتە ءوزىن وزگەلەردەن الشاق ۇستايدى. مۇنداي ادامدارعا عاشىق بولۋ جۇرەك اۋىرتقاننان باسقا ەشتەڭە اكەلمەيدى. روبوت بولماسا دا، سونىڭ كەيپىندەگىلەرگە كوڭىلى اۋعان ادامنىڭ سەزىم دەرتىنەن ايىعۋى دا اۋىرعا سوعادى. ەموتسيالىق تۇرعىدان «جابىق ەسىك» ساياساتىن جۇرگىزەتىندەر فەنومەنى تۋرالى كوپ ايتىلمايدى. دەسە دە، ورتا جاسقا دەيىن ۇيلەنبەۋ مەن كوپتەگەن اجىراسۋدىڭ سەبەبى وسى بولسا كەرەك. قازىر ميلليوندار ىشىندە جالعىزدار زامانى. قازىر جۇرەكسىزدەر عاسىرى. قازىر قورقاقتار كەزەڭى.
پسيحولوگ-كونسۋلتانت الماگۇل ماناپ بىلاي دەيدى:
1. بالا كۇنىندەگى قارىم-قاتىناستان ءبىر اۋىرلىق كورگەن ادامداردا مۇنداي بايقالادى.
2. «ءوز پروبلەمامدى شەشە الماي جۇرگەندە» دەپ، وزىنە جاۋاپكەرشىلىك العاسى كەلمەيتىن، بالا پوزيتسياسىنداعى ادامداردىڭ ىشكى جانە سىرقى قارسىلىعى بولادى. كوبىنەسە بالا كۇنىندە اتا-اناسىنان نەگاتيۆتى ەموتسيالار العان، وتباسىنىڭ قۇندىلىعىن تۇسىنبەيتىن نەمەسە قابىلدامايتىن ادامدارعا ءتان.
سويلەسىپ جۇرگەن ادامىڭىزدىڭ «ساياساتكەر» (ەموتسيالىق تۇرعىدان «جابىق ەسىك» ساياساتىن جۇرگىزەتىن) ەكەنىن انىقتاۋ قيىندىق تۋدىرمايدى. ادەتتە وندايلار وزدەرىنە ىڭعايلى ۋاقىتتا عانا حابارلاسادى، بەرگەن ۋادەسىن وڭايلىقپەن ۇمىتىپ كەتەدى، ءسىزدىڭ ومىرىڭىزدە نە بولىپ جاتىرعانى ونى قىزىقتىرمايدى، ءوزىنىڭ ءومىرى تۋرالى سۇراعاننىڭ بارىنە اشىلىپ ايتا بەرمەي، قىسقا قايىرادى. مۇنداي اداممەن ايلاپ سويلەسىپ جۇرگەننىڭ وزىندە ۋاقىت وتە كەلە ءسىز ونى مۇلدەم تانىمايتىن ادامداي كۇي كەشەسىز.
جۇرەكسىزدىككە تالپىنىپ جۇرگەندەر سەزىم تۋرالى كەز كەلگەن اڭگىمەدەن باس تارتادى. ءبىراق، ءبىر قىزىعى، ودان وزگە تاقىرىپتىڭ بارىنە ەشقانداي شەكتەۋسىز شەر تارقاتىپ، ءتىپتى، ناعىز اشىق ادامنىڭ كەيپىن تانىتادى. ولار ساياسي، ەكولوگيالىق جانە وزگە دە ماسەلەردە قوزعاپ، قىزىل كىتاپقا ەنگەن جانۋارلاردى قورعاۋ، اپات بولعان جەرلەرگە كومەكتەسۋ سىندى ناعىز گۋمانيستىك ارەكەتتەرگە دە بارۋى مۇمكىن. مۇنداي ساتتەر جۇرەكسىزدەر عاسىرىنىڭ وكىلىن ەموتسيالىق تۇرعىدان نازىك كورسەتەدى. دەگەنمەن، سەزىمگە كەلگەندە تۇمان تەز سەيىلەدى.
مەن وسكەن وتباسىدا ماحاببات سەزىمى بولمادى. اكەم انامدى ۇنەمى ۇراتىن. سونى كورىپ ءوستىم. ءوزىمدى سانالى عۇمىرىمدا سودان بارىنشا ساقتاپ قالعىم كەلدى. ءبىراق بۇل مەنىڭ بويىمدا ەشكىمگە سەنبەۋ، بارىنە كۇدىكپەن قاراۋ سىندى ادەمى ومىرگە كەرەعار سەزىمدەردى وياتتى. سانامنىڭ تۇكپىرىندە ۇيلەسىمدى وتباسى قۇرىپ، انا اتانعىم كەلەدى. ءبىراق...
ينستاگرامدا كۋرس ساتىپ الىپ، ىشكى ماسەلەلەرىمدى شەشۋگە تالپىندىم. ەڭ الدىمەن اناممەن سويلەسۋگە بەل بۋدىم. ول مۇنداي كورىنىستەردىڭ پاپامنىڭ ماحابباتى، قىزعانىشى كەسىرىنەن بولعانىن ايتادى. مەن وعان شىن ماحابباتتىڭ قول كوتەرۋگە جول بەرمەيتىنىن تۇسىندىرە المايمىن. ال اكەممەن سويلەسۋگە باتىلىم بارماي ءجۇر.
اسەم، 27 جاس
بۇل دا قانداي دا ءبىر دەڭگەيدە اۋتيزم نەمەسە شيزوفرەنيا سىندى جان دەرتى شىعار دەگەن ويدا قالاسىز. ايىرماشىلىق، نارتسيسستەر اۋتيست، شيزوفرەنيك سەكىلدى ءوزىن قوعامنان شەكتەمەيدى. كەرىسىنشە، كەيبىرىنىڭ الەۋمەتتىك جەلىدەگى پاراقشالارىنا قاراساڭىز اقكوڭىل ادامداي كورىنەدى. وندايلاردىڭ قانداي كۇي كەشەتىنى، ىشكى وي-تولعانىستارى تۋرالى سۇراعاندار اقىر اياعى ءوزىن جەككورىنىشتى سەزىنە باستايدى.
پەداگوگ-پسيحولوگ كاجيەۆا بەكزات: مۇنىڭ سەبەبى كوپ. ءبىرىنشى، ادام يدەال نارسەگە قۇمار كەلەدى. سونداي بار دەپ سەنەدى. جولىندا كەزدەسكەنگە كوڭىلى تولىق تولماسا، ونىمەن وتباسى قۇرماي، الدە دە وزىنە ساي كەلىپ قالاتىن جولىعار-اۋ دەگەن ۇمىتپەن جۇرەدى. مۇنداي تالاپشىلدىقتى ادام وزىنە قويسا يگى ەدى.
قازىرگى تاڭدا ەكىنشى ءبىر ءجيى كەزدەسەتىن سەبەپ: مانساپ قۋۋ، جەكە تۇلعا رەتىندى قوعامدا ورنىن الىپ، امبيتسيالارى جولىندا ەڭبەكتەنۋدى تاڭدايدى. ءۇشىنشى ماسەلە، ومىرلىك بازا جيعىسى كەلەدى. مىسالى، ءۇي السام، كولىك السام، بەلگىلى ءبىر قاراجاتىم بولسا، وتباسى قۇرام دەيدى. كەيىن سول جاعدايى جاسالعان ءومىردى ۇناتىپ قالادى. اينالاسىنداعى تۋعان-تۋىستارىنان وتباسى، بالا دەگەننىڭ كوپ ەنەرگيا مەن كۇش-قۋاتتى قاجەت ەتەتىن دۇنيە ەكەنىن كورىپ، وندايعا ءوز ەركىمەن كىرۋگە جۇرەكسىنەدى.
ءبىراق ءبىر نارسەنى بىلگەن ءجون. بۇل دەرت تە، اۋرۋ دا ەمەس. بۇل ادام ءوز قالاۋىمەن، كەيدە بەيسانالىق تۇرعىدا كەشەتىن كۇي عانا. ول ۇزاق مەرزىمدى نە قىسقا مەرزىمدى بولۋى مۇمكىن. ۇنەمى وسىنداي كۇي كەشۋدىڭ سەبەبى تۋرالى پسيحولوگتاردىڭ ءوز تۇجىرىمدارى بار. مىسالى، بالا كەزىندە اتا- اناسى اجىراسىپ، نەمەسە ەكەۋىنىڭ ءبىرى ومىردەن ءوتىپ، ۇلكەن دەپرەسسياعا تۇسكەنىن كورگەن ادام قانداي دا ءبىر ادامعا جاقىن بولۋدان ساقتانادى. ول ادامنان ايىرىلىپ قالعان جاعدايدا كەشەتىن كۇيزەلىستەن ءوزىن الدىن-الا قورعايدى.
بۇل كۇيگە ءجيى ءتۇسۋ ادەتتە نارتسيسستىك تيپتەگى تۇلعالارعا ءتان. وزدەرىڭىز بىلەتىندەي، نارتسيسس - گرەك ميفولوگياسىنداعى ءوز سىمباتىنا ءسۇيسىنىپ وزەنگە ءۇڭىلىپ وتىراتىن كەيىپكەر. كوپ جاعدايدا قوعامدا نارتسيسس دەپ ءوز-ءوزىن جاقسى كورەتىن ادامداردى اتايدى. ءبىراق، بۇل ۇعىمنىڭ الدەقايدا تەرەڭ ءمانى بار. مىسالى، ءبىز قولدانىپ وتىرعان نارتسيسس ۇعىمىنا ساي ادام ءوز-ءوزىن سونشالىقتى سۇيمەۋى مۇمكىن، ءبىراق ول وزگەنى ءسۇيۋ سەزىمىنەن قاشادى. سەبەبى، ولارعا جاس ءوسپىرىم كەزىنەن جۇك ارتىلعان. ول ءوز كۇنىن ءوزى كورۋگە داعدىلانعان. ەشكىمگە تاۋەلدى ەمەس. ەموتسيونالدى تۇرعىدان دا سونداي بولۋعا تىرىسىپ باعادى. كەز كەلگەن ماسەلەنى شەشىپ ۇيرەنگەن. قولىنان كەلمەيتىن ءىس جوقتاي كورەدى. ءبىر وكىنىشتىسى، ونىڭ قۇنى - قۋىس كەۋدەلىك. وسىنشاما جۇكتى ارقالاپ، بار كۇشىن سوعان جۇمسايتىن ادامنىڭ سەزىمگە ەنەرگياسى دا، ۋاقىتى دا قالمايدى. وندايلاردان «ماعان نەگە ايتپادىڭ، كومەكتەسەر ەدىم عوي» دەسەڭ، «ونىڭ ساعان قاتىسى قانداي؟!» دەگەن جاۋاپ الۋىڭىز ابدەن مۇمكىن (بۇل جاۋاپ سىزگە اسپان اۋدارىلىپ تۇسكەندەي اسەر ەتەرى انىق). ولار وزگەنىڭ قولداۋىنا تاۋەلدى بولىپ قالۋدان ساقتانادى.
بەلگىلى ءبىر ۋاقىتتا قارىم-قاتىناس قۇرۋدان قاشتىم. وعان سەبەپ الدىڭعى قارىم-قاتىناستاعى سۇيىكتىمنىڭ وپاسىزدىعى. كوڭىلىمە قاتتى تيگەنى سونشا، 2 جىلداي كۇيزەلىستە بولدىم. اراسىندا ارينە، قىزدارمەن سويلەستىم، كينوعا باردىم. ءبىراق تۇراقتى قارىم-قاتىناسقا كەلگەندە سول وپاسىزدىقتى كۇتىپ تۇردىم. «مەنى ءبىر كۇنى تاستاپ كەتەدى، ودان دا مەن ءبىرىنشى تاستاپ كەتەيىن» دەگەن قورعانىس رەاكتسياسى بولدى. قازىر عانا ەسىمدى جيدىم، قىزىم بار. ءبىراق وتكەنىم ساباق بولدى، قارىم-قاتىناستى ونداي جاعدايعا دايىنداپ قانا باستادىم.
نۇرجان، 28 جاستا
ال، بۇل كۇيدىڭ قىسقامەرزىمدى ۋاقىتشا ءتۇرى ادەتتە سۇيگەننىڭ ساتقىندىعىنان كەيىن پايدا بولادى. سەزىم سەرتسىزدىگىنەن ءجيى جابىعاتىن جان ۋاقىت وتە كەلە «جابىق ەسىك» ساياساتىن بەرىك ۇستاناتىن بولادى.
ادام جان دەرتىن قايتا-قايتا كەشكىسى كەلمەيدى. قالاۋى پاك ماحاببات بولسا دا، سەنىم جوق. سەزىمگە دە، سەرىككە دە. جۇرەك اۋىرپاۋدىڭ ءبىر جولى قالادى. ول - جالعىزدىق.
ءبىراق، جالعىزدىق قاشان دا سۋىق. ال، ادامعا جىلۋ كەرەك. كۇندەردىڭ كۇنىندە ول ادام وزىنە سىڭار ىزدەيدى. ءتىپتى، ونى تابۋى دا مۇمكىن. وسى كەزدە ۇلكەن ماسەلە تۋىندايدى. نارتسيسس سۇيەر، الايدا سۇيگەنىن كورسەتە المايدى. جالىقتىرىپ الارداي، سول جاننىڭ ەسىگىن قاعىپ تىنىشىن قاشىرعانداي بولماۋ ءۇشىن سۋىققاندىلىق تانىتادى. ونى وزگەلەر سەزىمنىڭ جوقتىعىنا بالارى انىق. سەبەبى، سۇيگەن ادام ءوزىن وزگەشە ۇستار ەدى. ونىڭ ۇستىنە، بۇلاردىڭ ەكەۋى دە جۇرەكسىزدەر زاماننىڭ جەمىسى بولسا، سەزىم ۇشقىنى بارىن ەشقاشان بىلمەي كەتۋى ابدەن مۇمكىن. ولار ءوز قاتەلىكتەرىن تۇسىنبەيدى. بۇل - تراگەديا.
كەيدە نارتسيسسيزمنىڭ اسقىنعان ءتۇرى كەزدەسەدى. ول جالعىزدىق دەرتىن تۇراقسىز قاتىناستارمەن ەمدەۋگە تىرىسادى. بىرەۋگە باۋىر باسا باستاعان ساتتە كوڭىلىن وزگە نىسانعا اۋدارا سالادى. سەبەبى، «ول سەرتتەسكىسى كەلمەيدى. سەرت - شەكتەۋ، سەرت - تاۋەلدىلىك». مۇنداي ارەكەتتىڭ ەكىنشى سەبەبى بار. ول «مۇمكىن كەلەسى قيىلىستا مەنى بۇدان دا كەرەمەت بىرەۋ كۇتىپ تۇرعان شىعار» دەگەن وي.
...ءسىز نە دەيسىز؟
massaget.kz