باقىت
سوقىر قۇس. سوندىقتان، كىم كورىنگەننىڭ باسىنا قونادى. قادىرىن بىلگەن ۇيالاتادى، بىلمەگەن ۇركىتەدى. ادام بالاسى ءومىرباقي سول قۇستان كوز الماي، كۇتىپ وتەدى. باقىتتى ءوز قولىمەن جاسايمىن دەيتىندەر دە بولادى. قولدان جاسالعان نارسەنىڭ قادىرى بولعانمەن، قاسيەتى بولسىن با...
جالعىزدىق
جاپالىق. ورتاڭنان وقشاۋلىق. وزگە ولشەم. اينالاڭنىڭ ارزاندىعىن سەزىنۋ. بيىگىڭ پاس، تەرەڭىڭ سايازداعانىنا قاپا بولۋ. بۇل - اقىلى بارلاردىڭ اۋرۋى، اقىلسىزدار جالعىزدىقتى سەزىنبەيدى عوي. «اقىماقتىڭ اتى ارىپ، تونى توزبايدى» دەگەندى اتام جامانقۇل راحىمەلى ءجيى ايتاتىن. الايدا، جالعىزدىق اللاعا عانا جاراسقان. بىزدىكى اشەيىن پەندەشىلىك.
ماحاببات
ءمان. مازمۇن. ءومىردىڭ ءمانى مەن مازمۇنىن ايتامىن. بۇل دا ادام بالاسىنا اللانىڭ جىبەرگەن قۇدىرەتى. جالعىز ادامعا عانا ەمەس، بۇكىل جان-جانۋارعا دا دارىتىلعان سيقىر. ولار تەك ونى سەزىنە المايدى، ولارعا جۇرەك دەيتىن «جۇدىرىق» بەرىلمەگەن. ماحاببات بار جەردە اسپانداۋ، ۇشۋ بار، مۇڭدانۋ بار. ساعىنىپ-سارعايۋ بار. اهىلاپ-ۇهىلەۋ بار. اسپانداۋ دەگەن، جۇماققا جاقىنداۋ ەمەس پە؟! دەمەك، ماحاببات - جۇماققا تالپىنۋ!
سۇلۋلىق
كوزدىڭ قۇرتى. ءتان سۇلۋلىعىن ايتام. «سىڭعىرلاپ وڭكەي كەلىسىم» دەپ اباي حاكىم ايتقانداي، سۇلۋلىق دەگەن - نازىكتىك، مولدىرلىك، ۇلبىرلىك، تۇزۋلىك، تازالىق، سيممەتريا، پاراللەل... ال جان سۇلۋلىعى كوكىرەگى سوقىرلارعا كورىنبەيدى. بۇلار دا اللانىڭ ءوزىنىڭ اسا ىقىلاسپەن جاراتقان پەندەسى ادامدى ەلجىرەي ءسۇيىپ، ءسۇيسىنىپ، شىن جۇرەگىمەن، ەرەكشە مەيىرلەنە جاسايتىن «شىعارماسى»، قۇدىرەتى.
قىزعانىش...
قىزىل ءيت. دەرت. ادام بالاسىنىڭ اعزاسىنا، مەندىك ەگويزم مەن مەنشىكتىك مەنتاليتەت پايدا بولعاندا، ءىبىلىس جىبەرگەن ىندەت. توباشىلدىق بار جەردە ول ءيت «ۇرمەيدى دە، ىرىلدامايدى». سۇيىسپەنشىلىكتەن تۋىنداعان قىزعانىش دەپ، ادامدار ءوزدى ءوزىن الدارقاتۋعا بولمايدى، دەمەك، ول سەزىم ەكەۋدىڭ بىرىندە جوق بولعانى...
تاعدىر
ادامداردىڭ وزدەرى، ءوز قولىمەن جاسايتىن تالكەگى. ءوزىڭ جاساعان نارسەگە وكپەلەۋگە بولمايدى... قوعام مەن زاماننىڭ تالكەگىندەگى تاعدىر - زاۋالدى كۇنا. ول زاۋالمەن كۇرەسىپ نەمەسە امالسىز مويىنسۇنىپ شەيىت بولعانداردىڭ جانى جانناتتا شىعار... زاۋال جاساعاندار - توزاقتا بولار...
تاۋەلدىلىك
قۇلدىق. كەمىستىكتى مويىنداۋ. نوقتاعا كونۋشىلىك. ىنجىقتىق. تۇياق سەرىپپەۋدى ادەتكە اينالدىرۋ.
تەكتىلىك پەن ۇلىلىق
تەرەڭدىك. قاننان كەلەدى. ۇلىلىق - بيىكتىك. اللادان داريدى.
ونەردىڭ ماقساتى
ومىردەگى وتىرىكتەردەن الشاقتاتۋ. كەزدەسە بەرمەيتىن ادىلەت پەن شىندىقتىڭ اۋىلىنا جول سىلتەۋ. ادام بالاسىنىڭ ءبىر-بىرىنە باۋىر ەكەندىگىن كوزگە شۇقىپ ايتۋ. جۇرەكتەرىنە كوبىرەك قۇلاق اسىپ، اقىلدارىن ات تەپپەۋىن ەسكەرتۋ.
ازىرلەگەن - ءاسيا باعداۋلەت قىزى
دەرەككوزى: «حالىق ءسوزى» گازەتى