مەملەكەتتىك قىزمەت ىستەرى اگەنتتىگىنىڭ باستاماسىمەن اۋىلدىق وكرۋگ اكىمدەرى اراسىندا «ۇزدىك اۋىل اكىمى» رەسپۋبليكالىق كونكۋرسى وتكىزىلدى. كونكۋرستىڭ ماقساتى - ۇزدىك اۋىل اكىمدەرىن انىقتاۋ جانە ناسيحاتتاۋ.
كەزدەسۋ بارىسىندا اگەنتتىك ءتوراعاسى ۇزدىك اۋىل اكىمدەرىن ءوز قىزمەتىندە حالىقتىڭ سۇرانىسىنا ساي اشىق، ادال ءارى ءادىل بولۋ ماڭىزدىلىعىنا توقتالىپ، اتالعان بايقاۋدىڭ اۋىلداردى دامىتۋعا جانە دە وسى باعىتتاعى جۇمىستاردى جانداندىرۋعا وڭ سەپتىگىن تيگىزەتىندىگىنە سەنىم ءبىلدىردى.
ءوز كەزەگىندە، اۋىل اكىمدەرىنە پرەزيدەنت جانىنداعى مەملەكەتتىك باسقارۋ اكادەمياسىندا كوشباسشىلىق، ءسوز سويلەۋ، داعدارىستىق كوممۋنيكاتسيا جانە ت. ب. داعدىلارىن شىڭداۋعا ارنالعان ارنايى ترەنينگتەر وتكىزىلدى.
اتاپ ءوتۋ كەرەك، كونكۋرسقا قاتىسۋ ءۇشىن ەلىمىزدىڭ تۇكپىر- تۇكپىرىنەن جۇزگە جۋىق اۋىلدىق وكرۋگ اكىمدەرى ءوتىنىم بەردى. وبلىستاردىڭ اراسىندا قوستانايدان - 14 اكىم، سولتۇستىك قازاقستاننان - 12، جامبىل وبلىسىنان 12 اكىم كونكۋرسقا ءوتىنىم بەرىپ، بەلسەندىلىك تانىتتى.
بايقاۋ ەكى كەزەڭدە وتكىزىلدى: وڭىرلىك جانە رەسپۋبليكالىق.
وڭىرلىك كەزەڭگە قاتىسۋشىلار اۋىلدىق جەرلەردە حالىقتىڭ ءومىر ءسۇرۋ جاعدايلارىن جاقسارتۋعا باعىتتالعان جوبالاردى قورعاپ، ەكونوميكالىق جانە الەۋمەتتىك اسەرى بار اۋىلدى دامىتۋ جونىندە ۇسىنىستار ەنگىزدى. ەكىنشى كەزەڭدە اۋىل اكىمدەرىنىڭ پروبلەمالىق جاعدايلار بويىنشا سيتۋاتسيالىق كەيستەردى شەشۋ قابىلەتىنە باعا بەرىلدى.
كونكۋرس قورىتىندىسى بويىنشا تۇركىستان وبلىسى شاردارا اۋدانى جاۋشىقۇم اۋىلدىق وكرۋگىنىڭ اكىمى نۇرسەيتوۆ نۇرباقىت داۋلەتبەك ۇلى «ۇزدىك اۋىل اكىمى» اتاعىن يەلەندى.
ەكىنشى ورىندى پاۆلودار وبلىسى ۋسپەن اۋدانى نوۆوپوكروۆسك اۋىلدىق وكرۋگىنىڭ اكىمى ۆياچەسلاۆ نيكولايەۆيچ سيمونەنكو، ءۇشىنشى ورىندى اقتوبە وبلىسى شالقار اۋدانى ايشۋاق اۋىلدىق وكرۋگىنىڭ اكىمى ورالبەك ءابشان ۇلى ءابشانوۆ يە بولدى.
سونداي- اق شىعىس- قازاقستان وبلىسى ۇلان اۋدانى ابلاكەت اۋىلدىق وكرۋگىنىڭ اكىمى اگلانبەكوۆ ارىسلان ورىنباساروۆيچ - «ۇزدىك شارۋاشىل اكىم»، قاراعاندى وبلىسى نۇرا اۋدانى بارشىن اۋىلدىق وكرۋگىنىڭ اكىمى مۋحانالييەۆا زاۋرە كازانبايەۆنا - «اشىق اكىم»، سولتۇستىك- قازاقستان وبلىسى اققايىڭ اۋدانى شاعالالى اۋىلدىق وكرۋگىنىڭ اكىمى دوبروميروۆا گۋلميرا ورازبايەۆنا - «ۇزدىك الەۋمەتتىك جوبا» نوميناتسيالارىنىڭ يەگەرلەرى اتاندى.
بايقاۋ جەڭىمپازدارى مەن نوميناتسيا يەگەرلەرى مەملەكەتتىك قىزمەت ىستەرى اگەنتتىگى ءتوراعاسىنىڭ قۇرمەت گراموتاسىمەن ماراپاتتالدى.