ەلدەگى بيلىكتى باسىپ العان ەكسترەميستىك قوزعالىس ايەلدەردىڭ جوعارى وقۋ ورىندارىنا كەلۋىنە تىيىم سالدى. سونىمەن قاتار، قىركۇيەك ايىندا ورتا مەكتەپتە وقيتىن قىزدار ساباقتان شەتتەتىلدى، دەپ حابارلايدى قازاقپارات.
الەۋمەتتىك جەلىلەردە ءبىر- بىرىمەن جىلاپ قوشتاسىپ جاتقان ستۋدەنتتەردىڭ ۆيدەوسى تارالدى.
«تالىپتەردىڭ ارەكەتى ايەلدەردى تولىقتاي باسىپ- جانشۋعا باعىتتالعان. ولار ايەلدەردىڭ ەلدىڭ دامۋىنا اتسالىسىپ، ەرلەرمەن بىرگە جۇمىس ىستەگەنىن قالامايدى. ولار تەك ايەلدەردىڭ ۇيدە وتىرىپ، بالا تاپقانىن دۇرىس كورەدى»، - دەيدى كابۋل ۋنيۆەرسيتەتىنىڭ ستۋدەنتى سەتەرا فاراحماند.
بىرنەشە پروفەسسور نارازىلىق رەتىندە جۇمىسىنان كەتتى، ال كوپتەگەن ەر ستۋدەنتتەر وقۋدان شىقتى.
سونىمەن قاتار، سارسەنبىدە تالىپتەر ايەل مۇعالىمدەر مەن باستاۋىش سىنىپتا وقيتىن قىزداردى مەكتەپكە كىرگىزبەۋدى بۇيىرعانى تۋرالى دا اقپارات تارادى.
ساراپشىلار تالىپتەردىڭ شەشىمى ولاردى حالىقارالىق دەڭگەيدە مويىندالۋ مۇمكىندىگىنەن ايىراتىنىن اتاپ ءوتتى.
بۇعان دەيىن ب ۇ ۇ ساراپشىلارى تالىپتەردىڭ اۋعانستانداعى ايەلدەر قۇقىعىنا كوزقاراسى ادامزاتقا قارسى قىلمىس بولۋى مۇمكىن ەكەنىن ايتقان.
ەسكە سالا كەتەيىك، تالىپتەر اۋعان ايەلدەرىنە ۋنيۆەرسيتەتتە وقۋعا تىيىم سالعان ەدى.
فوتو: Wakil KOHSAR / AFP
اۆتور
سماعۇلوۆا ەركەجان