مەملەكەت باسشىسى اسا كورنەكتى عالىم، قوعام قايراتكەرى، قازاقستان رەسپۋبليكاسى پارلامەنتى ءماجىلىسىنىڭ II جانە III شاقىرىلىمدارىنىڭ دەپۋتاتى امانگەلدى ايتالىنىڭ دۇنيەدەن وتۋىنە بايلانىستى ونىڭ وتباسى مەن جاقىن تۋىستارىنا كوڭىل ايتتى.
«امانگەلدى ءابدىراحمان ۇلى ۇزاق جىلدار بويى ءبىلىم جانە عىلىم سالاسىندا جەمىستى جۇمىس ىستەدى. سونىڭ ىشىندە اقتوبە مەملەكەتتىك پەداگوگيكالىق ينستيتۋتىندا جوعارى بىلىكتى ماماندار دايارلاۋ ىسىنە مول ەڭبەك ءسىڭىردى. ءماجىلىس دەپۋتاتى بولعان كەزىندە وتاندىق زاڭنامانى جەتىلدىرۋگە جانە پارلامەنتاريزمدى دامىتۋعا اتسالىستى. قاجىرلى قىزمەتىمەن ەلىمىزدىڭ وركەندەپ دامۋىنا ءوز ۇلەسىن قوسىپ، سوڭىنا جارقىن ءىز قالدىرعان امانگەلدى ءابدىراحمان ۇلىنىڭ ەسىمى مەن بەينەسى ۇمىتىلمايدى. مارقۇمنىڭ يمانى سالامات، جانى ءجانناتتا بولسىن»، - دەپ جازىلعان جەدەلحاتتا.
ايتا كەتەيىك، بۇعان دەيىن تانىمال قوعام قايراتكەرى امانگەلدى ايتالىنىڭ 83 جاسىندا دۇنيە سالعانىن جازعان بولاتىنبىز.
ول 1939 -جىلى استراحان وبلىسى ۆولودار اۋدانى بولدىريەۆو اۋىلىندا دۇنيە كەلگەن. ال جوعارى وقۋ ورنىن اقتوبەدە وقىعان.
1964-1967 -جىلدارى قازىرگى ءال-فارابي اتىنداعى قازاق ۇلتتىق ۋنيۆەرسيتەتىنىڭ اسپيرانتۋراسىندا ءبىلىم الدى.
ەڭبەك جولىن مەكتەپتە ورىس ءتىلى مەن ادەبيەتى مۇعالىمى بولىپ باستادى.
فيلوسوفيا عىلىمدارىنىڭ دوكتورى، پروفەسسور. ق ر قوعامدىق عىلىمدار اكادەمياسىنىڭ اكادەميگى.
ۇزاق جىلدار ءبىلىم جانە عىلىم سالاسىندا قىزمەت ەتكەن.
1999-2004 -جىلدار ارالىعىندا ەكىنشى شاقىرىلىمداعى جانە 2004-2007 -جىلدارداعى ءۇشىنشى شاقىرىلىمداعى پارلامەنت دەپۋتاتى.
بىرنەشە عىلىمي-كوپشىلىك كىتاپتىڭ جانە جۇزدەگەن عىلىمي ماقالانىڭ اۆتورى.
«قۇرمەت بەلگىسى، «پاراسات» وردەندەرىمەن ماراپاتتالعان، اقتوبە قالاسىنىڭ قۇرمەتتى ازاماتى.