کۇش اتاسى اتانعان الىپ قاجىمۇقان بىردە جولى ءتۇسىپ ءبىزدىڭ اۋىلعا کەلگەندە حالىق الدىندا ونەر کورسەتىپ، کەۋدەسىنە قويعان ۇلکەن تاستى اکەمە سالماعى اۋىر بالعامەن ۇرعىزادى. ءبىر سوققاندا-اق تاس ەکىگە ءبولىنىپ کەتەدى. پالۋان قولىن کوتەرىپ، «توقتات» دەگەن بەلگى بەرەدى. ادەتتە تاس جارىلماي، بىرنەشە سوققى جاسالادى ەکەن.
سول کۇنى کەشکىسىن اکەم قاجىمۇقاندى کولحوز باستىعى تۇرتاي اعاسىنىڭ ۇيىنە ماشيناسىمەن الىپ بارادى. تاماقتانىپ بولعان سوڭ «سەندە کۇش بار ەکەن، مەنىمەن کۇرەسکە ءتۇس» دەيدى. مۇنى ەستىگەندە اکەم شوشىپ کەتىپتى. قاجەکەڭ سوندا جاي عانا جىميىپ: «قورىقپا، مەن سەنى ەزىپ تاستامايمىن، ءتىپتى جىقپايمىن دا، تەڭ کۇرەسەمىز. کۇشىڭنىڭ بار ەکەنىن جۇرت ءبىلسىن، تاماشا کورىپ کوڭىلدەرى کوتەرىلسىن»، - دەپتى. ءسويتىپ، قالاي کۇرەسۋ قاجەتتىگىن ءوزى ەکى-ءۇش کۇن ۇيرەتىپ، حالىق الدىنا شىعۋعا دايارلىق جاساپتى.
ول کەزدە اپتانىڭ جۇماسى قازىرگى جەکسەنبى سياقتى دەمالىس ەکەن. سول کۇنى-اق «يشانبازار اۋىلىندا الەم چەمپيونى قاجىمۇقان مەن تەگىسشىل اۋىلىنىڭ 25 جاسار شوفەرى کۇرەسکە تۇسەدى» دەپ لاتىن ارپىمەن جازىلعان جارناما جان-جاققا تاراتىلادى. تاماشاعا حالىق کوپ جينالادى. بۇل اۋىلدان 20 شاقىرىم جەردەگى تاشکەنتتەن دە کورەرمەندەر اعىلىپ کەلەدى.
ەکى پالۋاننىڭ کۇرەسى ۇزاققا سوزىلىپتى. حالىق بۇل کەرەمەتکە سەنەرىن دە، سەنبەسىن دە بىلمەي مەنىڭ اکەمدى قولپاشتاپ، قاۋمالاپ جانە ەکى جۇمادان سوڭ قايتا کۇرەسۋگە ۇگىتتەيدى. قاجەکەڭنىڭ ماقساتى جۇرتتىڭ کوڭىلىن کوتەرۋ عوي، قۋانا کەلىسىمىن بەرەدى. سونىمەن کۇرەستى ۇيىمداستىرۋشىلار قارىمتا بەلدەسۋدىڭ ەکى اپتادان سوڭ وسى جەردە وتەتىنىن جاريالايدى.
بۇل حابار تالاي جەرگە تەز تاراپ، سىر بويىنداعىلار اتپەن، ەسەکپەن، تۇيەمەن ءبىر-ەکى کۇن بۇرىن کەلىپ جاتىپ الادى. قۇدا-جەکجاتتارىنا بارا الماي جۇرگەندەرگە بۇل سىلتاۋ بولادى. تاشکەنتتەن حالىق کوپ کەلەدى. کۇرەستى ءۇيدىڭ توبەسىنە، اعاش باسىنا شىعىپ کورگەندەر دە بولىپتى.
ەکى ارالىقتا پالۋان اکەمدى کۇرەسۋدىڭ تاکتيکاسىنا ۇيرەتەدى. بۇل کۇرەس تە تەپە-تەڭ اياقتالادى. ارينە، قاجىمۇقان جەڭۋ ءۇشىن ەمەس، سوعىس ەسەڭگىرەتکەن جۇرتتىڭ کوڭىلىن سەرگىتۋ ۇشىن کۇرەستى. سول ارقىلى مەنىڭ اکەمنىڭ ابىروي-بەدەلىن ارتتىرىپ کەتتى. مەن دە اکەمنىڭ اتاقتى قاجىمۇقانمەن کۇرەسکەنىن ۇدايى ماقتانىش تۇتىپ جۇرەمىن.
بە ک بولات تاسبولات ۇلى، وڭتۇستى ک قازاقستان وبلىسى.
دەرەككوز: «پرەزيدەنت جانە حالىق» رەسپۋبليكالىق قوعامدىق-ساياسي گازەتى. 2011