ازەربايجاننىڭ شۋشا قالاسى تۇركى مەملەكەتتەرىنىڭ مادەني استاناسى اتاندى
بۋرسا قالاسىندا حالىقارالىق تۇركى مادەنيەتى مەن مۇراسى قورىنىڭ قولداۋىمەن «بۋرسا - تۇركى الەمىنىڭ مادەني استاناسى 2022» جىلىنىڭ رەسمي جابىلۋ ءراسىمى ءوتتى، وعان «شۋشا كۇندەرى» ەكى كۇندىك قوعامدىق- ويىن- ساۋىق باعدارلاماسى دا كىردى.
شاراعا حالىقارالىق تۇركى مادەنيەتى مەن مۇراسى قورىنىڭ پرەزيدەنتى گۇنەي ەفەندييەۆا، تۇركسوي باس ديرەكتورى سۇلتان رايەۆ، تۇركى مەملەكەتتەرى ۇيىمىنىڭ باس ديرەكتورى كۋبانىچبەك ومىراليەۆ، سونداي-اق باۋىرلاس تۇركى مەملەكەتتەرى اتىنان وكىلدىك ەتەتىن ديپلوماتتار، جەرگىلىكتى اكىمدىك باسشىلارى، مەملەكەتتىك ورگاندار مەن ب ا ق وكىلدەرى قاتىستى.
«بۇكىل الەمدەگى تۇركى حالىقتارىنىڭ عاسىرلار بويعى قۇندىلىقتارىن زەرتتەيتىن، قورعايتىن جانە ناسيحاتتايتىن تۇركى مادەنيەتى مەن مۇراسى حالىقارالىق قورى بۋرسادا «شۋشا كۇندەرىن» وتكىزۋ باستاماسىن كوتەردى جانە بۇل ۇسىنىستى تۇركى ەلدەرىنىڭ مەملەكەت باسشىلارى قولداپ، سامارقاندتاعى تۇركى مەملەكەتتەرى ۇيىمىنىڭ IX سامميتى اياسىندا قابىلداندى، بۇل ونىڭ دەكلاراتسياسىندا دا كورىنىس تاپتى»، - دەپ اتاپ ءوتتى گۇنەي ەفەنديەۆا.
وسىلايشا، «شۋشا كۇندەرى» اياسىندا بۋرسا تۇرعىندارى مەن قوناقتارى «شۋشانىڭ بىرەگەي مارجانى» كوركەم- دەرەكتى فيلمىنىڭ پرەمەراسىنا، «مەنىڭ جۇرەگىم شۋشادا قالدى» سپەكتاكلىنىڭ قويىلىمىنا، الەمگە ايگىلى فوتوگراف رەزا دەگاتيدىڭ فوتوكورمەسىنە، سونداي-اق ازەربايجان ۇلتتىق كيىم ورتالىعىنىڭ جەتەكشىسى سانگەر-ديزاينەر گۇلنارا حاليلوۆانىڭ «قاراباق» كوللەكسياسىنىڭ كورسەتىلىمىنە باردى.
«Yeddi gِzəl» جوباسى دا كەلۋشىلەردىڭ نازارىن اۋداردى، ونىڭ نەگىزگى يدەياسى - ورتاق تۇركى تامىرى مەن باي تاريحي مۇراسى بار (ازەربايجان، قازاقستان، قىرعىزستان، تۇركيا، وزبەكستان، تۇرىكمەنستان جانە ماجارستان) جەتى ەلدىڭ مۋزىكانتتارىنان تۇراتىن سەپتەت (جەتى ورىنداۋشىدان تۇراتىن مۋزىكالىق انسامبل) قۇرۋ. ۇجىم قۇرامىندا قازاقستان اتىنان حالىقارالىق كونكۋرستاردىڭ لاۋرەاتى جانە استانا قالاسى مەملەكەتتىك اكادەميالىق فيلارمونياسىنىڭ ءسوليسى مايا مەدەتبەك قاتىستى.
ۇيىمداستىرۋشىلار اتاپ وتكەندەي، بۇل شارا تۇركى الەمىنىڭ باي تاريحي جانە مادەني مۇراسىن ناسيحاتتاۋعا جانە باۋىرلاس ەلدەردى ۇلتتىق جانە رۋحاني قۇندىلىقتار نەگىزىندە جاقىنداستىرۋعا ىقپال ەتەدى. وعان قوسا، قاتىسۋشىلار ازەربايجاننىڭ كورنەكتى تۇلعالارىنىڭ وتانى جانە باي مۇراسىنىڭ بەسىگى - شۋشا قالاسىنىڭ الداعى جىلى تۇركى مەملەكەتتەرىنىڭ مادەني استاناسى دەپ جاريالانۋى تاريحتاعى جاڭا جانە وراسان زور بەلەس ەكەنىن اتاپ ءوتتى.
سەرىكبول قوشماعامبەتوۆ