سونداي-اق ءورت سوندىرۋشىلەر 10 ادامدى قۇتقارعان، دەپ حابارلايدى قازاقپارات توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ.
«16-جەلتوقسان كۇنى ساعات 01:51 دە تەمىرتاۋ قالاسىنىڭ اقتاۋ كەنتىندەگى (جاقىن جەردەگى ءورت ءسوندىرۋ بولىمىنەن 27 شاقىرىم جەردە) 5 قاباتتى تۇرعىن ۇيدە ءورت شىققانى تۋرالى حابار ءتۇستى. العاشقى ءورت ءسوندىرۋ ءبولىمى وقيعا ورنىنا 02:25-تە جەتتى. 1-قاباتتاعى 3 بولمەلى پاتەردە 40 شارشى مەتر اۋماقتا ءورت شىققان. توتەنشە جاعدايلار دەپارتامەنتىنىڭ بولىمشەلەرى جەتكەنگە دەيىن تۇرعىندار 5 ادامنىڭ ءمايىتىن (2007، 2010 -جىلى تۋعان ۇلدار، 1983، 1991 -جىلى تۋعان ايەلدەر، 1991 -جىلى تۋعان ەر ادام) كىرەبەرىستەن كوشەگە الىپ شىققان. زارداپ شەككەن ادامدار جوعارعى قاباتتارداعى پاتەرلەردەن ءتۇتىن باسقان كىرەبەرىس ارقىلى وزدىگىنەن ەۆاكۋاتسيالانباق بولعان.
باسپالداق الاڭى جانباعان، الايدا ءتۇتىننىڭ كوپ مولشەردەگى كونتسەنتراتسياسى سالدارىنان تۇرعىندار دالاعا شىعىپ ۇلگەرمەگەن»، - دەپ حابارلادى ق ر ت ج م ورتكە قارسى قىزمەت كوميتەتىنىڭ ءتوراعاسى نۇربولات دەربىسوۆ.
كەيىننەن بارلاۋ جانە جانىپ جاتقان پاتەردەگى ءورتتى ءسوندىرۋ بارىسىندا التىنشى ادامنىڭ (1977 -جىلى تۋعان ەر ادام) دەنەسى تابىلدى. ءۇش ادام اۋىرلىعى ورتاشا ءتۇرلى دەڭگەيدەگى دەنە جاراقاتتارىن العان. سونداي-اق ءورت سوندىرۋشىلەر باسپالداق پەن تىنىس الۋ اپپاراتىنىڭ كومەگىمەن ءتۇتىن باسقان پاتەردىڭ كىرەبەرىسىنەن 10 ادامدى، ونىڭ ىشىندە 4 بالانى قۇتقاردى. ءورت 03:10 دا وقشاۋلانىپ، 04:00 دە ءسوندىرىلدى.
ءورتتى سوندىرۋگە قاراعاندى وبلىسى توتەنشە جاعدايلار دەپارتامەنتىنىڭ 16 قىزمەتكەرى مەن 4 تەحنيكاسى جۇمىلدىرىلدى.
«ءورتتىڭ شىعۋ سەبەبى انىقتالىپ جاتىر. وقيعا ورنىندا سىناق ءورت زەرتحاناسىنىڭ ماماندارى مەن تەرگەۋشىلەر جۇمىس ىستەۋدە. ءورت فاكتىسى بويىنشا پوليتسيا قىزمەتكەرلەرى ق ر قىلمىستىق كودەكسىنىڭ 292-بابى بويىنشا قىلمىستىق ءىس قوزعادى»، - دەپ اتاپ ءوتتى مينيسترلىكتىڭ باسپا ءسوز قىزمەتى.
فوتو: قاراعاندى وبلىسى ت ج د باسپا ءسوز قىزمەتى