«1- قىركۇيەكتەن كەيىن شەتەلدەن كولىك اكەلگەن، سول كولىكتى وسى شارا اياسىندا زاڭداستىرىپ العىسى كەلەتىندەر نە ىستەۋى كەرەك؟» - دەپ سۇرادى جۋرناليستەردىڭ ءبىرى ورتالىق كوممۋنيكاتسيالار قىزمەتىندە وتكەن بريفينگىدە.
كوميتەت باسشىسى مەملەكەت ۇسىناتىن جەڭىلدىك 2022-جىلدىڭ 1- قىركۇيەگىنە دەيىن كىرگىزىلگەن كولىك يەلەرىنە عانا ۇسىنىلاتىنىن ەسكە سالدى.
«پرەزيدەنت انىق ايتتى عوي، زاڭداستىرۋ تەك 2022-جىلدىڭ 1- قىركۇيەگىنە دەيىن اكەلىنگەن كولىكتەرگە عانا ۇسىنىلادى. ال، 1- قىركۇيەكتەن كەيىن اكەلىپ، زاڭ بويىنشا زاڭداستىرماعان كولىكتەر ءبىزدىڭ جولداردا جۇرە المايدى. ويتكەنى، ولار بەكىتىلگەن ءتارتىپ بويىنشا تىركەلمەگەن. جول قوزعالىسىنا ەركىن قاتىسۋ ءۇشىن كولىكتى ءتيىستى تارتىپپەن تىركەۋدەن وتكىزۋ كەرەك - مەملەكەتتىك ءنومىر الىپ، كولىكتىڭ تىركەلگەنى تۋرالى كۋالىك راسىمدەۋ قاجەت. بۇل قۇجاتتار بولماسا، جول قوزعالىسىنا قاتىسۋعا حاقىڭىز جوق. زاڭ بويىنشا جاۋاپكەرشىلىك ارقالايسىز. اكىمشىلىك كودەكس بويىنشا 1 رەت ۇستالعاندا 10 ايلىق ەسەپتىك كورسەتكىش، قايتالاپ ۇستالعان جاعدايدا 20 ا ە ك ايىپپۇل سالىنادى نەمەسە كولىك جۇرگىزۋ قۇقىعىنان 1 جىلعا ايىرۋ جازاسى قولدانىلادى»، - دەدى قايسار سۇلتانبايەۆ.
بۇعان دەيىن ءى ءى م اكىمشىلىك پوليتسيا كوميتەتى ءتوراعاسىنىڭ مىندەتىن اتقارۋشى قايسار سۇلتانبايەۆ زاڭداستىرۋعا جاتاتىن كولىك يەلەرى 200 مىڭ تەڭگەلىك الىمنان باسقا قانداي تولەمدەر جاسايتىنىن ايتتى.
سونداي-اق، زاڭداستىرۋعا جاتاتىن كولىكتەردىڭ قازاقستانعا كىرگەن كۇنى قالاي ايقىندالاتىنى ءمالىم بولدى.
مەملەكەت ۇسىنعان مۇمكىندىكتى پايدالانباي، شەتەلدىك كولىگىن زاڭداستىرماعان ادامدار ءۇشىن ەكى-اق جول بار ەكەنى ايتىلدى جانە ءرۋلى وڭ جاقتاعى كولىكتەردى زاڭداستىرۋ قاجەتتىگى نەدەن تۋىنداعانى ءتۇسىندىرىلدى.