استانا. قازاقپارات - 17-19-جەلتوقسان ارالىعىندا استانا قالاسىنداعى EXPO حالىقارالىق كورمە ورتالىعىنىڭ الاڭىندا «جاڭا جىل Fest» جاڭاجىلدىق جارمەڭكەسى وتەدى.
ءىس-شارانى استانا قالاسى اكىمدىگىنىڭ قولداۋىمەن «QazExpoCongress» ۇلتتىق كومپانياسى» اكسيونەرلىك قوعامى ۇيىمداستىرادى، دەپ حابارلايدى قازاقپارات.
«جاڭا جىل Fest» جارمەڭكەسى - ميكروبيزنەس، شاعىن جانە ورتا بيزنەس وكىلدەرىن (ونىڭ ىشىندە وتاندىق وندىرۋشىلەر)، سونداي-اق قولدان جاسالعان بۇيىمداردى ۇسىناتىن استانا قالاسى مەن ەل وڭىرلەرى (كوكشەتاۋ، قوستاناي، وسكەمەن، قىزىلوردا، شىمكەنت، الماتى قالالارى، اقمولا مەن ماڭعىستاۋ وبلىستارى جانە ت. ب. ) قولونەرشىلەرىنىڭ باسىن قوسىپ، قولداۋ كورسەتەتىن الەۋمەتتىك جوبا. ءىس- شاراعا 200 گە جۋىق قاتىسۋشى اتسالىسادى.
جارمەڭكەدە ءارتۇرلى ءىس-شارالار وتكىزىلەدى: جاڭاجىلدىق ساۋدا، اياز اتا، اقشاقارمەن ەرتەڭگىلىكتەر، قۋىرشاقتارمەن ينتەراكتيۆتى ءىس-شارالار، كيىزدەن مەرەكەلىك شۇلىق جاساۋ، سلايم، بىلەزىكتەر، شىرشا اشەكەيلەرى، كيىزدەن جاسالعان قابىرعاعا ىلەتىن شامدار، اشىقحاتتارعا ارنالعان اپپليكاتسيالار جاساۋ بويىنشا بالالارعا ارنالعان شەبەرلىك ساعاتتارى، سونىمەن قاتار كەلۋشىلەرگە جاڭاجىلدىق فوتوايماقتار، مۋلتفيلمدەر جانە ت. ب. ۇسىنىلادى.
جارمەڭكە بارىسىندا كەلۋشىلەر جاڭا جىلعا ارنالعان سىيلىقتار مەن كادەسىيلاردى تاڭداپ الىپ قانا قويماي، مەرەكە كۇندەرى قارساڭىنداعى دەمالىستارىن قىزىقتى وتكىزە الادى.
سونىمەن قاتار جارمەڭكە اياسىندا جاستارعا ارنالعان مادەنيەت جانە سپورت فەستيۆالى - Qogam Urban Festival وتەدى. Q- FEST 12 باعىت بويىنشا ۇيىمداستىرىلادى: Hip-Hop, Breaking, Freestyle، سكەيتبوردينگ، فۋتبول فريستايلى، پاركۋر، اگرەسسيۆتى روليكتەر جانە ت. ب.