ماڭعىستاۋلىق «جورعا» بي انسامبلى حالىقارالىق بايقاۋدىڭ باس جۇلدەسىنە يە بولدى
بايقاۋعا ارمەنيا، گرۋزيا، رەسەي، بەلارۋس ەلدەرىنىڭ ەڭ ۇزدىك بي ۇجىمدارى قاتىسقان. كورەرمەن مەن قازىلار القاسىنىڭ نازارىنا ۇسىنىلعان 47 بي قويىلىمى اراسىندا «جورعا» بي انسامبلى فولكلورلىق باعدارلاماسىمەن توپ جارعان.
اتاپ ايتساق، ماڭعىستاۋلىق بيشىلەردىڭ شەبەر ورىنداۋىنداعى «قۇسبەگى» ءبيى 1-ورىندى، «باستاڭعى» ءبيى گران-پري جانە «سالتانات» ءبيى سۋپەر گران-پري جۇلدەسىن العان.
«بۇل بايقاۋ وسىمەن 5-رەت وتكىزىلىپ وتىر. قازىلار القاسى قۇرامىندا يتاليا، بولگاريا، رەسەي ەلدەرىنىڭ ماماندارى بولدى. ءبىز فولكلورلىق باعىتتا ۇلتتىق سالت-ءداستۇرىمىز بەن ادەت- عۇرپىمىزدى، بوزبالا مەن بويجەتكەن اراسىنداعى سەزىمدى، بەتاشار ءراسىمىن بي ارقىلى كورسەتتىك. ءانسامبلدى دايىنداۋدا ەڭبەكتەنگەن ەرلان ماتايبايەۆ، اينۇر سارييەۆا، قۋاندىق بايانبەردييەۆ، قۋاندىق تاڭاتاروۆقا العىسىم شەكسىز. بۇل جەڭىس ۇجىمنىڭ 25 -جىلدىعى اياسىندا بيشىلەرگە كەرەمەت موتيۆاتسيا بولدى»، - دەدى «جورعا» بي انسامبىلىنىڭ جەتەكشىسى سەرىك ساريەۆ.