بۇل تۋرالى ق ر باس پروكۋراتۋراسى 1 قىزمەت باستىعىنىڭ ورىنباسارى ەلدوس قيلىمجانوۆ ءمالىم ەتتى، دەپ حابارلايدى قازاقپارات ءتىلشىسى.
«باس پروكۋراتۋرا قاڭتار وقيعاسىنا قاتىستى تەرگەۋ ناتيجەلەرىمەن جۇرتشىلىقتى تانىستىرۋدى جالعاستىرىپ جاتىر. قۇقىق قورعاۋ ورگاندارى 5 مىڭنان استام قىلمىستىق ءىس تىركەدى. تەرگەۋ كەزىندە 4,5 مىڭ ساراپتاما جاسالدى. جاپپاي تارتىپسىزدىككە قاتىسۋ جانە ۇيىمداستىرۋ فاكتىسى بويىنشا سوتقا دەيىنگى 131 ءىس تىركەلدى. قىلمىس جاساۋ بويىنشا 931 ادام كۇدىكتى دەپ تانىلدى، 96 ادام قاماۋعا الىنىپ، 471 ادام سوتتالدى»، - دەدى ەلدوس قيلىمجانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ودان بولەك، باس پروكۋراتۋرا وكىلى ۇيىمداسقان شابۋىلدىڭ بولعانىن ايتتى.
«تەرگەۋ بارىسىندا انىقتالعانداي، بەيبىت ازاماتتار مەن پوليتسەيلەرگە قارسى ۇيىمداستىرىلعان تۇردە شابۋىل جاسالعان. ولار ارماتۋرا، تاياق، تاس باسقا دا قۇرالداردى قولدانعان. سونىمەن قاتار عيماراتتاردى ورتەۋ ءۇشىن اۆتوموبيل دوڭعالاقتارى مەن بەنزين جەتكىزىلگەن»، - دەيدى ول.