بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ادىلەتتى ءارى دامىعان مەملەكەت قۇرۋ ءۇشىن جاڭا كادر ساياساتىن جۇرگىزۋ كەرەك. الداعى وزگەرىستەر، ەڭ الدىمەن، ادام كاپيتالىنا قاتىستى بولادى. جاڭا كادر ساياساتى مەريتوكراتيا جانە كاسىبيلىك قاعيداتتارىنا نەگىزدەلەدى. ءبىز ءبىرىنشى باسشىلاردى وسى قاعيداتتار بويىنشا تاعايىندايمىز. سونىمەن بىرگە ولاردىڭ ورىنباسارلارى قانشالىقتى بىلىكتى ەكەنىن سارالاۋ قاجەت. ويتكەنى تۇتاس سالالاردىڭ جانە ايماقتاردىڭ دامۋى كوبىنە ورىنباسارلاردىڭ جۇمىسىنا بايلانىستى بولادى»، - دەدى پرەزيدەنت.
مەملەكەت باسشىسى ۆيتسە-مينيستر جانە اكىم ورىنباسارى لاۋازىمدارىنا ناعىز كاسىبي ماماندار تاعايىندالۋعا تيىستىگىن باسا ايتتى.
«مۇنداي قىزمەتكە جۇرتپەن تىلدەسە الاتىن، كوزى اشىق، كوكىرەگى وياۋ ازاماتتار كەلۋى كەرەك. ياعني، شەشىم قابىلداي الاتىن جانە جاۋاپكەرشىلىكتەن قورىقپايتىن ازاماتتار قاجەت. ولاردىڭ ءادىل، ەڭبەكقور جانە وتانشىل بولۋى اسا ماڭىزدى»، - دەدى قاسىم-جومارت توقايەۆ.