فۋتزالدان الەم چەمپيوناتى: قازاقستان وزبەكستان قۇراماسىن جەڭدى

استانا. قازاقپارات - مالايزيادا ەستۋ قابىلەتىنەن ايرىلعان 21 جاسقا دەيىنگى سپورتشىلار اراسىندا فۋتزالدان الەم چەمپيوناتى ءوتىپ جاتىر. وندا قازاقستان قۇراماسى ءساتتى ونەر كورسەتۋدە، دەپ حابارلايدى قازاقپارات Futsal Kazakhstan-پاراقشاسىنا سىلتەمە جاساپ.

قازاقستان كومانداسى وزبەكستاندىق قارسىلاستارىن 9:4 ەسەبىمەن ايقىن باسىمدىقپەن جەڭدى.

ويىن باسىندا قازاقستاندىقتاردىڭ قورعانىستاعى قاتەلىگىن ۇتىمدى قولدانعان وزبەك سپورتشىلارى ەسەپ اشىپ، 0:2 ناتيجەسىمەن العا شىقتى.

دەگەنمەن ەل فۋتبولشىلارى تەز جيناقتالىپ، بىرنەشە مينۋتتا 4 گول سوعىپ، ەسەپتى ءوز ەنشىلەرىنە بۇردى.

ەندى قازاقستان قۇراماسى «ا» توبىنىڭ 1/4 فينالىندا كەلەسى ويىندى 11- جەلتوقساندا ازەربايجان كومانداسىنا قارسى وتكىزەدى. جارتىلاي فينالعا وتكەن جاعدايدا سپورتشىلارىمىز مالايزيا - تايلاند ماتچىنىڭ جەڭىمپازىمەن كەزدەسەتىن بولادى.

بۇعان دەيىن حابارلاعانىمىزداي، قازاقستاندىقتار الەم چەمپيوناتىنداعى العاشقى كەزدەسۋىندە قىتاي قۇراماسىن 22:0 ەسەبىمەن ويسىراتا جەڭگەن ەدى.