قازاقستاندىق بالۋاندار الەم كۋبوگىنا قاتىسادى

استانا. قازاقپارات - قازاقستاندىق ءجاميلا باقبەرگەنوۆا مەن ازامات داۋلەتبەكوۆ بۇگىن، 10- جەلتوقساندا ا ق ش- تا باستالاتىن ەركىن جانە ايەلدەر كۇرەسىنەن الەم كۋبوگىندا جۇلدىزدار قۇراماسى ساپىندا سىنعا تۇسەدى، دەپ حابارلايدى قازاقپارات ءتىلشىسى.

جارىس ەرەجەسى بويىنشا الەم چەمپيوناتى رەيتينگى بويىنشا العاشقى بەستىكتە تۇرعان قۇرامالار قاتىسادى. ولاردىڭ قاتارىنا جۇلدىزدار جيناقتالعان التىنشى قۇراما قوسىلادى.

ەلىمىزدىڭ اتىنان ازامات داۋلەتبەكوۆ پەن ءجاميلا باقبەرگەنوۆا جۇلدىزدار جيناقتالعان قۇراما ساپىندا ويىن كورسەتەدى.

ءبىرىنشى كەزەڭ ەلوردا ۋاقىتىمەن 22:00 دە باستالسا، ەكىنشىسى 03:00، ءۇشىنشىسى 06:30 دا بولادى. قازاقستاندىق بالۋاندار ەكىنشى جانە ءۇشىنشى كەزەڭدە كۇرەسەدى.

ايتا كەتسەك، الەم چەمپيوناتىندا ايەلدەر كۇرەسىنەن ءجاميلا باقبەرگەنوۆا كۇمىس السا، ەركىن كۇرەستەن ازامات داۋلەتبەكوۆ قولا جۇلدەگە قول سوزدى.