بوكستان قازاقستان چەمپيوناتىندا اعايىندى جىگىتتەر جەڭىمپاز اتاندى

استانا. قازاقپارات - پاۆلودار قالاسىنداعى «بايانتاۋ» سپورت سارايىندا بوكستان ەرلەر اراسىندا قازاقستان چەمپيوناتى مارەسىنە جەتتى، دەپ حابارلايدى قازاقپارات ءتىلشىسى.

بىرىنشىلىك قورىتىندىسىندا 13 سالماق دارەجەسى بويىنشا چەمپيوندار انىقتالدى.

فينالدىق باسەكەدە 48 كەلىگە دەيىنگى سالماقتا 2021 -جىلعى الەم چەمپيونى، اقمولا وبلىسىنىڭ وكىلى تەمىرتاس ءجۇسىپوۆ الماتىلىق ەرنۇر قايراتتان تاجىريبەسى مەن شەبەرلىگىنىڭ باسىم ەكەندىگىن كورسەتتى.

الماتى وبلىسىنان كەلگەن دامير ءابدىقادىر (51 ك گ) باتىسقازاقستاندىق دانيال سابيتپەن جۇدىرىقتاستى. بۇل سالماقتا تورەشىلەر شەشىمىمەن جەڭىس د. ءابدىقادىرعا بەرىلدى. وسىدان ەكى جىل بۇرىن 18 جاسىندا فينالدا ت. ءجۇسىپوۆتى ۇتىپ، قازاقستان چەمپيونى اتانعان د. ءسابيت وتكەن جىلى سانجار تاشكەنبايعا ەسە جىبەرسە، بيىل دا كۇمىس جۇلدەنى قاناعات تۇتتى.

بۇدان كەيىن 54 ك گ سالماقتا 19 جاستاعى قىزىلوردالىق نۇرسۇلتان التىنبەك اقتوبەلىك بەكزات الدامجاروۆتان ايلاسىن اسىردى.

57 كەلىگە دەيىنگى سالماقتا فينالدا اقمولالىق ورازبەك اسىلقۇلوۆپەن بوكستاسقان پاۆلودارلىق ەربولات سابىردىڭ قولى كوتەرىلدى.

قاراعاندىلىق تالعات سىرىمبەتوۆ (60 ك گ) الماتى وبلىسىنىڭ وكىلى ەراسىل تاڭقايدى قاپى قالدىرسا، بيىلعى ازيا چەمپيوناتىندا ەل نامىسىن قورعاعان ماڭعىستاۋلىق ساناتالى تولتايەۆ 63,5 كەلىگە دەيىنگى سالماقتا تۇركىستاندىق مۇحامەدسابىر بازارباي ۇلىن جەڭدى.

شىمكەنتتىك، 19 جاستاعى ابزال سەرىك (67 ك گ) تۇركىستاندىق تەمىرحان تەزەكتى تىزە بۇكتىرسە، اباي وبلىسىنان كەلگەن ەرماحان جاكپەكوۆ (71 ك گ) باتىسقازاقستاندىق، 20 جاستاعى سابىرجان اققالىقوۆتى ۇتتى.

جامبىلدىق دياس مولجىگىتوۆ (75 ك گ) پاۆلودارلىق اياتۋللا تاكىجانوۆتان باسىمدىلىعىن بايقاتسا، تاعى ءبىر ابايلىق، ەرماحاننىڭ ءىنىسى، 20 جاستاعى ەراسىل جاكپەكوۆ (80 ك گ) اقتوبەلىك جانىبەك قارتبايەۆتى جەڭدى.

وسىلايشا، ءبىر ۇيدەن اعايىندى جاكپەكوۆتەر قازاقستان چەمپيونى اتاندى. جالپى، ەلىمىزدە اعايىندى نۇربەك پەن ايبەك ورالباي جانە ءساناتالى مەن ءساماتالى تولتايەۆتىڭ تابىستى ونەر كورسەتىپ جۇرگەنى بەلگىلى.

بيىلعى ازيا چەمپيوناتىنىڭ قولا جۇلدەگەرى، تۇركىستاندىق ساعىندىق توعامبايدىڭ (86 ك گ) ءۇشىنشى راۋندتا قاسى جارىلىپ، قازىلار ۇيعارىمەن پاۆلودارلىق شايمۇرات قۇسايىنوۆقا جول بەردى.

تاجىريبەلى بوكسشى، تاعى ءبىر تۇركىستاندىق ابزال قۇتتىبەكوۆ (92 ك گ) الماتىلىق، سپورت شەبەرلىگىنە ۇمىتكەر دانيار راحيمبەردينوۆتىڭ مەسەلىن قايىردى.

اسا اۋىر سالماقتا اتىراۋلىق امانات سابىرعاليمەن رينگكە شىققان الماتىلىق دامير تويبايدىڭ باعى جاندى.

سونىمەن، قازاقستان چەمپيوناتى الدىڭعى تولقىننىڭ ءىزىن باسا الاتىن جاس بوكسشىلاردىڭ دا ءوسىپ كەلە جاتقاندىعىن كورسەتتى.

ەسكە سالا كەتەيىك، بۇدان بۇرىن بوكستان قازاقستان چەمپيوناتىنىڭ فينالىنا شىققان سپورتشىلار انىقتالعانىن جازعان بولاتىنبىز.