ە و ادىلەت جانە ىشكى ىستەر كەڭەسى وتىرىسىنىڭ قورىتىندىسى بويىنشا حورۆاتياعا قاتىستى شەنگەن زاڭناماسىن تولىق قولدانۋ تۋرالى شەشىم قابىلداندى. «چەحيانىڭ ە و- عا ءتوراعالىعى كەزىندە حورۆاتيا ەۋروپالىق ينتەگراتسياسىندا ەكى ماڭىزدى قادام جاساعانىنا قۋانىشتىمىن. ول ەۋروعا جانە شەنگەن ايماعىنا قوسىلدى. بۇل ساتتىلىك باسقا دا مۇشە ەلدەرگە جول اشاتىنىنا سەنىمدىمىن. ءبىز ارىپتەستەرىمىزبەن تاياۋ بولاشاقتا بولگاريا مەن رۋمىنيانى شەنگەن وتباسىنا كىرگىزۋ ءۇشىن بار كۇشىمىزدى سالامىز»، - دەدى چەحيانىڭ ىشكى ىستەر ءمينيسترى ۆيت راكۋسان.
ىشكى ىستەر مينيسترلەرى سونىمەن قاتار اقپاراتتىق تەحنولوگيا جۇيەلەرىنىڭ ۇيلەسىمدىلىگى مەن ميگرانتتاردىڭ زاڭسىز كىرۋىنە قارسى تۇرۋدى قوسا العاندا، ىشكى قاۋىپسىزدىك شارالارىنا باسا نازار اۋدارا وتىرىپ، شەنگەن ايماعىنىڭ جالپى جاعدايىن تالقىلادى.
ەۋروپالىق ب ا ق- تىڭ جازۋىنشا، مينيسترلەر حورۆاتيانى شەنگەن ايماعىنا قابىلداۋدان بولەك، بولگاريا مەن رۋمىنيانىڭ ۆيزاسىز ايماققا كىرۋىن قاراۋى ءتيىس ەدى. بۇعان ەۋرووداقتىڭ باسقا مۇشەلەرى - اۋستريا مەن نيدەرلاند قارسى بولعان.
«اۋستريا حورۆاتيانى قولدايتىنىن ءبىراق 2007 -جىلى ە و- عا كىرگەن بولگاريا مەن رۋمىنياعا قارسى ەكەنىن انىق ءبىلدىردى. ال، نيدەرلاندتىقتار رۋمىنيانى قابىلداسا دا، بولگارياعا قارسى»، - جازدى euaktiv.
اۋستريا مەن نيدەرلاند بولگاريالىق جانە رۋمىنيالىق شەكارا باقىلاۋ جۇيەسى ەۋروپاعا زاڭسىز ميگرانتتاردى وتكىزۋ ءۇشىن ءالسىز دەپ ەسەپتەيدى.