«سەنات قابىرعاسىندا كولىك تۋرالى زاڭ جوباسىن تالقىلادىق. كومپانيالارعا قويىلاتىن تالاپتاردى تاعى قاتاڭداتامىز. سوعان قاراماستان جاعدايلار ورىن الىپ جاتىر. ەستەرىڭىزدە بولسا، جازدا SCAT جانە Air Astana اۆياكومپانيالارى رەيستەرىنىڭ كەشىگۋ جاعدايى بولدى. ءبىز ولارعا اپتا سايىن ايىپپۇل سالدىق. جاعداي رەتتەلگەن سەكىلدى. جالپى ماسەلەنى شەشۋدىڭ ەكى جولى بار. الدىمەن، اكىمشىلىك جاعى، ياعني اۋە كومپانيالارىنىڭ جاۋاپكەرشىلىگىن رەتتەۋ ارقىلى. ولار كەز كەلگەن فورس- ماجورعا دايىن بولۋى ءتيىس. ەكىنشى شەشىم، ۇشاقتار سانىن ارتتىرۋ. بيىل 14 ۇشاق ساتىپ الىندى، ونىڭ 9 ى SCAT- قا تيەسىلى»، - دەدى قايىربەك وسكەنبايەۆ سەناتتىڭ جالپى وتىرىسىنان كەيىن تىلشىلەردىڭ سۇراعىنا جاۋاپ بەرە تۇرىپ.
ءمينيستردىڭ مالىمەتىنشە، 2025 -جىلعا دەيىن تاعى 51 ۇشاق ساتىپ الىنادى.
بۇعان دەيىن قايىربەك وسكەنبايەۆ تايلاندقا ۇشا الماي قالعان قازاقستاندىقتاردىڭ جاعدايىنا قاتىستى تۇسىنىك بەرگەن ەدى. ونىڭ ايتۋىنشا، جولاۋشىلاردىڭ ماسەلەسىن ازاماتتىق اۆياتسيا كوميتەتى قاراپ جاتىر.