«پرەزيدەنت سايلاۋى بويىنشا 8 وڭىردەن 14 رەسمي شاعىم ءتۇستى. داۋىس بەرۋ بارىسىنا قاتىستى ازداعان ەسكەرتۋ بولدى. ول بويىنشا ءبىز تالداۋ جۇرگىزدىك. داۋىس بەرۋشىلەرگە 2 جانە ودان دا كوپ بيۋللەتەن بەرۋ جاعدايى، ءالى دە اشىق كۇيىندە قالىپ وتىر. بايقاۋشىلاردىڭ سۇراۋى بويىنشا داۋىس بەرۋ پروتسەسىنە قاتىستى مالىمەتتەر حاتتاماعا ساي بەرىلدى. ءبىز ەشنارسەنى جاسىرمايمىز. سونداي- اق، بيۋللەتەندى جاشىككە سالۋ پروتسەسىنە قاتىستى تۇركىستان جانە قاراعاندى وبلىسىندا 2 فاكتىنىڭ بولعانى ايتىلدى. دەگەنمەن انىقتاۋ بارىسىندا فاكتىلەر راستالدى. وسى ورايدا بىزگە اباي بولعان ءجون، مۇمكىن جاڭا ادىسكە كوشۋ كەرەك شىعار»، - دەدى ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ ەلوردادا ءوتىپ جاتقان اۋماقتىق سايلاۋ كوميسسياسى باسشىلارىنا ارنالعان رەسپۋبليكالىق سەميناردا.
ايتا كەتسەك، پرەزيدەنت سايلاۋى بارىسىن شەت مەملەكەتتەردەن 532 بايقاۋشى قاداعالادى.
ەسكە سالايىق، استانادا ورتالىق سايلاۋ كوميسسياسىنىڭ ۇيىمداستىرۋىمەن اۋماقتىق سايلاۋ كوميسسياسىنىڭ باسشىلارىنا ارنالعان رەسپۋبليكالىق سەمينار ءوتىپ جاتىر. بارلىق وڭىردەن 300 گە جۋىق ادام قاتىسىپ جاتقان شارا ءۇش كۇنگە سوزىلادى.