جۇرگىزۋشىلەر اۋىل ىشىندە جۇرگەن قار بارىسىن ۆيدەوعا ءتۇسىرىپ الدى
الەۋمەتتىك جەلىدە تاراعان ۆيدەودان بارىستىڭ اۋىل ىشىندە ەركىن جۇرگەنىن كورۋگە بولادى. ءتىپتى قاسىنان ءوتىپ بارا جاتقان كولىكتەن دە قورىقپاعان. ال، ۆيدەوعا تۇسىرگەن جۇرگىزۋشى قار بارىسىنىڭ جاتاقحانا ماڭىندا جۇرگەنىن جەتكىزگەن.
ولكە تانۋشى عاني نازاربەك بۇل وقيعانىڭ قاسكەلەڭ ايماعىنداعى اقساي شاتقالىندا بولعاندىعىن مالىمدەدى.
«بۇل بارىستى «ىلە الاتاۋى» ۇلتتىق تابيعي پاركى ماڭىندا پلاتينا قۇرىلىسىن جۇرگىزىپ جاتقان قۇرىلىسشىلار ءتۇسىرىپ العان. حالىققا كەلەتىن ەشقانداي قاۋىپ جوق» دەيدى ول.
جەلىدە جاريالانعان ۆيدەوعا قىزىعۋشىلىق ءبىلدىرىپ جاتقاندار كوپ. وقىرماندار ءتۇرلى پىكىرلەر جازىپ، وقيعانىڭ ءمان- جايىن سۇراپ جاتىر.
عاني نازاربەك مىرزانىڭ وسى پوستى بويىنشا بارىس تۋرالى ۆيدەو «ىلە- الاتاۋى مەملەكەتتىك ۇلتتىق تابيعي پاركى» رەسپۋبليكالىق مەملەكەتتىك مەكەمەسىنىڭ اقساي فيليالىندا تۇسىرىلگەن ەكەن. ۇلتتىق پارك اۋماعىن بارىس بۇرىننان بەرى مەكەندەيدى، دەيدى وسى سالا ماماندارى.
«وسىعان وراي بۇگىن ۇلتتىق پاركتىڭ عىلىمي زەرتتەۋ ءبولىمىنىڭ مامانى مەن اقساي فيليالىنىڭ اڭتانۋشى- بيولوگ مامانى اقساي فيليالىنا زەرتتەۋ جۇمىستارىن جۇرگىزۋگە شىقتى»، - دەدى قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگى قوعاممەن بايلانىس دەپارتامەنتىنىڭ ديرەكتورى ولجاس بەركىنبايەۆ.