«قازاقستاندا قىلمىستىق ارەكەتى سوتتا دالەلدەنگەن قارجى پيراميدالارىنا قايتا قاراجات تارتۋ جاعدايلارى جيىلەپ بارادى. ولاردى بۇرىنعى جالعان ينۆەستيتسيالىق قىزمەتتىڭ ويدان شىعارىلعان تۇراقتىلىعىن كورسەتىپ، تانىمال اتاۋلاردى، اقشا تارتۋدىڭ بىردەي ادىستەرىن قولداناتىن ارام پيعىلدى ادامدار اشادى» دەلىنگەن حابارلامادا.
بۇعان دەيىن قارجىلىق مونيتورينگ اگەنتتىگى «LV Force»، «World Business Consulting» ، «The Finico»، «Caspian Crocus»، «B2B Jewelry»، «پ ك ەلىماي-2019»، «مەبەلنىي پروەكت نۋر»، «ليدەر»، «ليدەر كاپيتال-168»، «نارىمبەتوۆا»، «Hermes - LTD» جانە ت. ب. سياقتى قارجىلىق پيراميدالاردىڭ قىزمەتىنە توسقاۋىل قويعان بولاتىن.
ولار قاراپايىم مەسسەندجەرلەردەن باستاپ ءبىلىم بەرۋ كۋرستارى مەن جىلجىمايتىن مۇلىك ساتىپ الۋعا دەيىن ءارتۇرلى قىزمەت تۇرلەرىن ۇسىنىپ، ازاماتتاردان اقشا الۋدىڭ قىلمىستىق سحەمالارىن جۇزەگە اسىرعان.
«كومپانيالار قارجى پيراميداسى بولىپ، حالىق جيناعان قاراجاتىنان ايىرىلىپ جاتقانىنا قاراماستان، كەيبىر ازاماتتار قىلمىسكەرلەردىڭ جارنامالىق ناۋقاندارىنا ءىلىنىپ، اقشا سالۋدى جالعاستىرۋدا.
وسىعان بايلانىستى قارجىلىق مونيتورينگ اگەنتتىگى پروفيلاكتيكالىق جۇمىستارعا باسا نازار اۋدارىپ، وقۋشىلار مەن ستۋدەنتتەر اراسىندا قارجىلىق قاۋىپسىزدىك جانە ساۋات اشۋ ساباقتارىن وتكىزىپ، قارجىلىق پيراميدا بەلگىلەرى بار سايتتار مەن اككاۋنتتاردى انىقتاۋ ءۇشىن زاماناۋي تەحنولوگيالاردى قولدانۋدا.
ازاماتتاردى قىراعى بولۋعا، جيناقتارىن كۇماندى قارجىلىق كومپانيالارعا سالماۋعا شاقىرامىز! ەگەر ءسىز نەمەسە ءسىزدىڭ جاقىندارىڭىز قارجى پيراميداسىنىڭ قىزمەتىنە تاپ بولسا، بۇل تۋرالى قارجىلىق مونيتورينگ اگەنتتىگىنە دەرەۋ حابارلاۋىڭىزدى سۇرايمىز»، - دەپ حابارلايدى اگەنتتىكتىڭ باسپا ءسوز قىزمەتى