ەكىباستۇزدا ەر ادام ءوز ۇيىندە ۇسىكتەن قايتىس بولعانى تۋرالى WhatsApp جەلىسىندەگى حابارلاما شىندىققا جاناسپايدى. قالا اكىمدىگىنىڭ باسپا ءسوز قىزمەتىنەن ءمالىم ەتكەندەي، ۇيلەردىڭ بىرىندە شىنىمەن دە زەينەتكەر كوز جۇمعان. ءبىراق ونىڭ ولىمىنە پاتەردىڭ سۋىق بولۋى سەبەپ بولماعان.
ەر ادام كوزى تىرىسىندە گيپەرتونيا اۋرۋىنا شالدىققان.
جەدەل جاردەم ستانسياسىنىڭ اقپاراتىنا سايكەس، ساعات 17:32-دە ەكىباستۇز قالاسىنداعى پاتەرلەردىڭ بىرىندە ەر ادام ەسىنەن تانىپ قالعانى تۋرالى حابارلاما تۇسكەن.
«مەديتسينا قىزمەتكەرلەرى 8 مينۋتتا جەتتى. وقيعا ورنىندا دارىگەرلەر 70 جاستاعى ەر ادامنىڭ كوز جۇمعانىن انىقتادى. ەشقانداي ۇسىك بەلگىلەرى بايقالعان جوق»، - دەدى ستانسيانىڭ باسپا ءسوز قىزمەتىنەن.
ساعات 17:50-دە پاتەرگە پوليتسيا شاقىرىلعان. ەر ادام كوز جۇمعان كەزدە ونىڭ جۇبايى قاسىندا بولعان. پوليتسەيلەر ەر ادامنىڭ دەنەسىندە زورلىق-زومبىلىق بەلگىلەرى بولماعانىن اتاپ ءوتتى.
پوليتسەيلەر ەكىباستۇز تۇرعىندارىن تەك رەسمي اقپارات كوزدەرىنە سەنۋگە شاقىرىپ، جالعان اقپارات تاراتقانى ءۇشىن جاۋاپكەرشىلىك قاراستىرىلعانىن ەسكەرتتى.