«اپات ج ە و- دا بولعان جوق. تەكسەرۋدىڭ ناتيجەسى بويىنشا قۇبىرلارداعى اقاۋلار ستانتسياداعى قىزمەتكەردىڭ قاتە ارەكەت جاساۋىنان بولعان. سالدارىنان جەلىدەگى قىسىم ارتقان. قىسىم جوعارىلاپ كەتكەندىكتەن قۇبىرلار كوپ جەردەن جارىلعان»، - دەدى رومان سكليار.
ۆيتسە-پرەمەر جىلۋ ەلەكتر ورتالىعىنىڭ جاعدايى جاقسى بولماسا دا، وسى ۋاقىتقا دەيىن جۇمىس ىستەپ تۇرعانىن اتاپ ءوتتى.
«جىلدار بويى ج ە و مەن جەلىلەر قالاي باسقارىلعانى، باسشىلار قانداي جۇمىس جاساعانى، قانشالىقتى كۇتىپ ۇستالعانى جانە جوندەۋلەرگە قانشا قارجى بولىنگەنىنە قىلمىستىق ءىس شەڭبەرىندە باعا بەرىلەدى»، - دەپ توقتالدى پرەمەر-ءمينيستردىڭ ورىنباسارى.
بريفينگ بارىسىندا جۋرناليست اسحات نيازوۆ وليگارح الەكساندر كلەبانوۆتىڭ ءقازىر قايدا ەكەنىن دە سۇرادى.
«الەكساندر كلەبانوۆ ءقازىر استانادا. وندىرىستىك ماسەلەلەردى شەشۋمەن اينالىسىپ جاتىر. ەكىنشى اكتسيونەر - سەرگەي كان وسىندا، ياعني ستانسيادا. ا. كلەبانوۆ ەرتەڭ كەلەدى»، - دەپ جاۋاپ بەردى رومان سكليار.
پرەمەر-ءمينيستردىڭ ورىنباسارى الەكساندر كلەبانوۆتى جاۋاپكەرشىلككە تارتۋ تۋرالى سۇراققا ماسەلە بويىنشا ءتيىستى تۇجىرىم جاسالعان كەزدە قاراستىرىلاتىنىن ايتتى.
27-قاراشادا ەكىباستۇز جىلۋ ەلەكتر ورتالىعىندا اپات بولىپ، قالا تۇرعىندارى جىلۋسىز قالعان ەدى.
كەيىنىرەك جىلۋ قازاندىعىنىڭ ىستەن شىعۋىنا بايلانىستى وبلىس اكىمى باستاعان جەدەل شتاب قۇرىلدى.
ەكىباستۇز قالاسىنىڭ وقۋشىلارى ونلاين وقيتىنى حابارلاندى. قالا اكىمىنىڭ ايتۋىنشا، 3 شاعىناۋدانعا ءالى جىلۋ بەرىلگەن جوق.
28-قاراشا تاڭەرتەڭ قالادا جەرگىلىكتى اۋقىمداعى توتەنشە جاعداي جاريالاندى.
30-قاراشادا ەكىباستۇزعا پرەمەر-مينيستر ءاليحان سمايىلوۆ بارىپ، كىنالىلەر جاۋاپقا تارتىلاتىنىن ايتتى.
اپات سەبەبى رەتىندە جىلۋ جەلىلەرىنىڭ توزۋى، جىلۋ ورتالىعى باسشىلىعى تاراپىنان نەمقۇرايدىلىق بولعانى جانە ينۆەستيتسيالاردىڭ جەتكىلىكسىزدىگى اتالدى.
كەشە تاڭەرتەڭ ۇسىنىلعان مالىمەتكە سايكەس، 17 كوپقاباتتى تۇرعىن ءۇي ورتالىق جىلۋ جەلىسىنە ءالى قوسىلعان جوق. ونىمەن قوسا، 58 تۇرعىن ءۇي سۋدان اجىراتىلدى.