بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين دەپ حابارلايدى قازاقپارات ءتىلشىسى.
بۇگىن سەناتتىڭ جالپى وتىرىسىنان كەيىن وتكەن باسپا ءسوز ءماسليحاتىندا تىلشىلەر مينيستردەن ۇيالى بايلانىس وپەراتورلارى ينتەرنەت تاريفتەرىن نەگە كوتەرىپ جاتقانىن سۇرادى.
«باسكەلەستىك ورتا ادىلەتتى تاريفتەر مەن ساپالى ينتەرنەتتى قامتاماسىز ەتۋگە ىقپال ەتەدى. سوندىقتان مينيسترلىك قۇزىرلى ورگان رەتىندە ءتيىستى زاڭداردى دايارلاۋى كەرەك. ياعني دەپۋتاتتارمەن تالقىلاپ، سول زاڭداردى قابىلداۋ ماڭىزدى بولىپ تۇر. وسى ورايدا ادىلەتتى تاريف بولاتىنىنا سەنەمىن»، - دەدى ب. مۋسين.
ونىڭ ايتۋىنشا، قازىرگى كەزدە ەكى وپەراتور عانا ۇيالى بايلانىس قىزمەتتەرىن ۇسىنىپ وتىر.
«مونوپولياسىزداندىرۋ كوميسسياسىندا دا وسى ماسەلەنى كوتەردىم. ءبىزدىڭ نارىققا باسقا دا وپەراتورلاردى كىرگىزۋ كەرەك. سوندىقتان ۇكىمەت باسشىسىنىڭ دەڭگەيىندە بۇل ماسەلەنى تالقىلاپ، «قازاق تەلەكوم» مەن «سامۇرىق-قازىناعا» ءتيىستى ءىس-شارالاردى پىسىقتاۋدى تالاپ رەتىندە قويدىق. ياعني، ءبىر وپەراتوردى «قازاق تەلەكومنىڭ» ىشىنەن شىعارىپ، نارىقتىق ورتادا باسقا بيزنەسمەندەرگە بەرۋ كەرەك ەكەنىن ايتىپ وتىرمىز. ولار بۇل باعىتتا جۇمىس ىستەپ جاتىر. كەلەر جىلدىڭ باسىندا وتەتىن كوميسسيا وتىرىسىندا اتقارىپ جاتقان جۇمىستارىن باياندايتىن بولادى»، - دەدى مينيستر.