پاۆلودار وبلىسىنىڭ پروكۋراتۋراسى جىلۋ جەلىلەرىندەگى ءىرى زاقىمدانۋ، جەلىلىك سۋدىڭ قىسىمىن تومەندەتۋ جانە «ەكيباستۋزتەپلوەنەرگو» ج ش س سۋ جىلىتۋ قازاندىقتارىن توقتاتۋ فاكتىسى بويىنشا قازاقستان رەسپۋبليكاسى قىلمىستىق كودەكسىنىڭ 254-بابى (مىندەتتەرگە جوسىقسىز قاراۋ) بويىنشا سوتالدى تەرگەۋدى تىركەدى، ول ءۇشىن 5 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن.
«سوتالدى تەرگەۋ پاۆلودار وبلىسى بويىنشا پوليتسيا دەپارتامەنتى، ەكونوميكالىق تەرگەۋ دەپارتامەنتى جانە سىبايلاس جەمقورلىققا قارسى ءىس-قيمىل دەپارتامەنتى قىزمەتكەرلەرىنىڭ ۆەدومستۆوارالىق جەدەل-تەرگەۋ توبىنا تاپسىرىلدى. پاۆلودار وبلىسى پروكۋرورىنىڭ قاۋلىسىمەن قىلمىستىق قۋدالاۋدىڭ زاڭدىلىعىن قاداعالاۋدى جۇزەگە اسىرۋ بويىنشا پروتسەسسۋالدىق پروكۋرورلارىنىڭ توبى ايقىندالدى»، - دەلىنگەن حابارلامادا.
تەرگەۋ بارىسى وبلىس پروكۋرورىنىڭ جەكە باقىلاۋىنا الىندى.
ەسكە سالايىق، اپات سالدارىنان بىرنەشە كوپقاباتتى جانە جەكە تۇرعىن ءۇي، ءبىرقاتار الەۋمەتتىك نىساندار جىلۋسىز قالىپ، 123 تۇرعىن، ونىڭ ىشىندە بالالار دا ەۆاكۋاتسيالانعان بولاتىن. ءبىلىم بەرۋ نىساندارى قاشىقتىقتان وقىتۋ فورماتىنا كوشتى، بالاباقشالاردىڭ جۇمىسى توقتاتىلدى.