«ەلىمىزدە جىلىتۋ ماۋسىمى باستالماي جاتىپ، قازاقستان قالالارىندا جىلۋ ەلەكتر ورتالىقتارى ىستەن شىعىپ، ريددەر، ەكىباستۇز قالالارىندا تەحنوگەندى اپات جاعدايى قالىپتاستى. پرەزيدەنت قاسىم-جومارت توقايەۆ جاعدايعا شۇعىل باعا بەرىپ ۇكىمەتكە ەلىمىزدىڭ بارلىق جىلۋ وبەكتىلەرىن تەكسەرىپ، اپاتتى جاعداي بولماۋى ءۇشىن ءتيىستى ءىس-شارالار جونىندە تاپسىرما بەردى. وسىعان وراي، «AMANAT» پارتياسى فراكتسياسىنىڭ مۇشەلەرى ەكىباستۇز قالاسىنا بارىپ، قيىن-قىستاۋ كەزەڭدە حالىقپەن بىرگە بولىپ، جۇرتشىلىقتىڭ پىكىرىن تىڭدادى. ماسەلەنى جۇرتشىلىقپەن جان-جاقتى قاراستىردىق»، - دەدى ە. سايروۆ.
ونىڭ ايتۋىنشا، ەنەرگەتيكا سالاسىنداعى نەگىزگى پروبلەمالار ماگيسترال جەلىلەرىنىڭ توزۋىنا قاتىستى بولىپ تۇر. ەكىباستۇزدا جەلىلەردىڭ توزۋ دارەجەسى 91 پايىزعا جەتكەن. بۇل تۇرعىدا جىلۋ ەلەكتر ورتالىقتارىن جاڭارتۋعا نازار اۋدارىلماعان، سونداي-اق وسى ينفراقۇرىلىمعا ينۆەستيتسيا جەتكىلىكسىز بولىپ تۇر.
دەپۋتاتتىڭ پايىمىنشا، ستراتەگيالىق نىسانداردى ءتۇرلى جولمەن ادىلەتسىز يەمدەنىپ، وسى حالىقتىڭ مۇلكىن ونداعان جىلدار بويى يگەرىپ، پايدا تاۋىپ وتىرعان وليگارحيالىق توپتار ەلىمىزدىڭ اۋماعىنداعى ماگيسترال جەلىلەرى مەن جىلۋ ەلەكتر ستانتسيالارىن جاڭعىرتۋعا قارجى سالعىسى كەلمەيدى.
«وليگارحيالىق توپتار بۇل نىسانداردىڭ پايداسىن سۇلىكتەي سورىپ، ەندى پروبلەمانى مەملەكەتكە، حالىققا ىلمەكشى. «AMANAT» پارتياسى حالىقتىڭ مۇڭ- مۇددەسى، ءار-ءبىر ازاماتتىڭ جان تىنىشتىعى باستى ماقسات دەپ ەسەپتەيدى. ۇكىمەت مەملەكەت باسشىسىنىڭ تاپسىرماسى اياسىندا مىنا ماسەلەلەرگە باسا نازار اۋدارۋى قاجەت. بىرىنشىدەن، ەنەرگەتيكا كاسىپورىندارىن تولىق تەحنيكالىق اۋديتتەن وتكىزۋ كەرەك. ەكىنشىدەن، جىلۋ ەلەكتر ورتالىقتارىنىڭ، ماگيستارل جەلىلەرىنىڭ توزۋ دارەجەسىن انىقتاي وتىرىپ، حالىقتان الىناتىن تاريف اياسىندا ينۆەستيتسيالىق قاراجاتتىڭ قايدا كەتكەنىن انىقتاۋ كەرەك»، - دەدى ەرلان سايروۆ.
سونىمەن قاتار ول جىلۋ ەلەكتر ورتالىقتارى مەن ءتيىستى جەلىلەردىڭ تەحنيكالىق جاعدايى ءۇشىن كاسىپورىن اكتسيونەرلەرىنىڭ قۇقىقتىق جاۋاپكەرشىلىگىن قاراستىرۋ كەرەك ەكەنىن اتاپ ءوتتى.
«2015-2022-جىلدارى جىلۋ جۇيەلەرىنە ءتۇرلى مەملەكەتتىك باعدارلامالار ارقىلى 183 ميلليارد تەڭگە بولىنگەن. وسى سومانىڭ قايدا، قالاي جۇمسالعانىنا تەكسەرۋ جۇرگىزۋ ماڭىزدى. جالپى ەنەرگەتيكا سالاسىنا ، قوعامدىق باقىلاۋ ورناتۋعا جان-جاقتى ءمان بەرۋ كەرەك»، - دەدى ە. سايروۆ.
27- قاراشادا ەكىباستۇز جىلۋ ەلەكتر ورتالىعىندا اپات بولىپ، قالا تۇرعىندارى جىلۋسىز قالعان ەدى.
وسىدان كەيىن قالاداعى بالالاردى قولداۋ ورتالىعىنىڭ تاربيەلەنۋشىلەرى پاۆلودارعا اۋىستىرىلىپ، مەكتەپ وقۋشىلارى ونلاين ءبىلىم الۋعا كوشىرىلدى.
پرەمەر-مينيستر ءاليحان سمايىلوۆ ەكىباستۇز قالاسىنداعى جاعدايدى قالپىنا كەلتىرۋ بويىنشا ءبىرقاتار تاپسىرما بەردى.