ول جوق بولسا كورىنگەننىڭ قولجاۋلىعىنا اينالىپ ءجۇنجىپ جوعالاسىڭ. وقۋدا، جۇمىستا دا مەنى العا جەتەلەگەن - ۇلتتىق نامىس. نامىسى جوعالعان حالىقتا ەشقانداي بولاشاق بولمايدى. مەندە نامىس بولماسا ءوز انا ءتىلىم - قازاق ءتىلىن ۇيرەنبەس ەدىم. قايتسەم دە ۇيرەنەمىن دەپ ءوز-وزىمە سەرت بەردىم. مەن قازاقپىن! ءوز انا تىلىمدە سويلەمەسەم، كىم بولعانىم؟! ورىسشا سويلەپ، سول تىلدە ويلاۋدى وزىمە ار سانادىم. ءوز تىلىمدە سويلەي الماعانىما قاتتى نامىستاندىم. قازاق ءتىلىن ولەڭ-جىر، ايتىس ارقىلى ۇيرەندىم. قازىر قازاقشا ۇيرەنگىسى كەلمەيتىن قازاقتاردى ءوزىنىڭ ۇلتتىق دۇنيەتانىمىنا قارسى ادامدار دەپ سانايمىن.
انا تىلىنەن قاشقان ادام - اناسىنان قاشقان ادام. ءوز تىلىنەن بەزگەن پەندەنى مەن ادام رەتىندە ساناي المايمىن. پارلامەنتتە دەپۋتات بولىپ جۇرگەندە تالاي ماسقارانى كوردىم. جاپ-جاس جىگىتتەردىڭ الدىندا اقساقالدار قۇراق ۇشىپ، سۇرىنە-قابىنا جۇگىرىپ جۇرگەنى. قاي-قايسىندا نامىس جوق. انا بالانىڭ اقشاسى كوپ، قىزمەتى جوعارى. اقساقالدا دا نامىس جوق، قارا باسىنىڭ قامىنا بولا بالاسىنداي جىگىتتىڭ اياعىنا باس ۇرىپ، ەمپەڭدەپ جاتقانى. ەرتەدە بايدىڭ مالىن باعىپ جۇرگەن كەدەيدىڭ ءوزى بايمەن بىرگە ءبىر داستارحاندا قاتار وتىرعان. مالشى، جالشى بولسا دا بايدىڭ اياعىنا باسىن قويماعان حالىق ەدىك عوي.
«بىرەۋ مەنى ءبىر ۇردى، مەن ونى ەكى ۇردىم» دەگەن سەكىلدى قىرت ماقتان ەمەس، قازىرگى قازاقتىڭ نامىسى باسقا بولسا دەيمىن. قازىر ورىستار دا قازاشا ءتىل سىندىرىپ، ولەڭ ايتا باستادى. كەزىندە قالىڭ ورىستىڭ ورتاسىندا ءجۇرىپ مەن دە ورىسشا ولەڭ ايتقانمىن. ەندى ولار دا ءسويتسىن. نامىستىڭ جوقتىعىنان قازاق ازاماتتارى وزىنە-ءوزى قوجا بولۋى كەرەك ەكەنىن ۇمىتىپ قالدى. قازىر نامىسسىزدىقتىڭ ۇستىنە جالقاۋلىق كەلىپ قوسىلدى. نامىسى جوق ادام ءوزىن مەملەكەتتىڭ يەسى رەتىندە سەزىنە المايدى. ولاردا قانداي مەملەكەتتىك سانا بولۋى مۇمكىن. سوندىقتان دا جۇمىسسىز قازاقتاردىڭ سانى كۇن ساناپ كوبەيۋدە. بۇدان بىلاي قازاق نامىسىن كۇن كورۋ جولىنا جۇمساسىن. بازاردا اربا ايداعاننان گورى زاۋىتتا جۇمىس ىستەۋگە ۇمتىلسىن. ماماندىق يەلەنسىن، قولىنان ءىس كەلەتىن بولسىن. سوندا عانا ول ءوزىن-ءوزى قولعا الادى. ءسويتىپ، ءوزىن قور ساناۋدان قۇتىلادى.
توقتار اۋباكىروۆ
دەرەككوز: «نامىس» سايتى. 2011-جىل