بۇل تۋرالى يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلبايەۆ ايتتى، دەپ حابارلايدى قازاقپارات ءتىلشىسى.
«اتالعان سۋبسيديالاۋ تەتىگى قاراستىرىلعان. ءبىراق قازىرگى تاڭدا قاراجاتتىڭ شەكتەۋلىگىنە بايلانىستى، كەلەسى جىلعا ءوتىنىم بەردىك. ول ءوتىنىم قارجى مينيسترلىگى تاراپىنان قولداۋ تاپپادى. بۇل ماسەلە قارجاتقا تىرەلىپ تۇر. اتاپ ايتقاندا، ەكىنشى دەڭگەيلى بانكتەن يپوتەكا العان جاعدايدا، سونىڭ 7 پايىزىن مەملەكەت تاراپىنان جابۋ ماقساتىندا، سونداي-اق يپوتەكانىڭ تارتىمدىلىعىن ارتتىرۋ ءۇشىن وسىنداي تەتىكتى قاراستىرعان بولاتىنبىز. دەگەنمەن كەلەسى جىلعا بۇل تەتىك بويىنشا قارجى قاراستىرىلعان جوق»، - دەدى ە. داۋىلبايەۆ سەناتتاعى ۇكىمەت وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
سونىمەن قاتار ول قارجى تابىلسا، اتالعان سۋبسيديالاۋ تەتىگى «7-20-25» باعدارلاماسىمەن قاتار جۇرەتىنىن ناقتىلادى.
ەسكە سالساق، بيىل شىلدە ايىندا «بايتەرەك» ۇلتتىق باسقارۋ حولدينگىنىڭ باسقارما ءتوراعاسى قانات شالاپايەۆ يپوتەكانىڭ جاڭا ءتۇرى ىسكە قوسىلۋى مۇمكىن ەكەنىن ايتقان ەدى.
وسى ورايدا ەكىنشى دەڭگەيلى بانكتەردىڭ نارىقتىق يپوتەكاسى بويىنشا سىياقى مولشەرلەمەسىن سۋبسيديالاۋ تەتىگىن ىسكە قوسۋ ۇسىنىلدى.
بۇدان بۇرىن حابارلانعانداي، ەلىمىزدە «7-20-25» باعدارلاماسى جالعاسادى.