فۋتبولدان ءا چ: پورتۋگاليا گانانى ۇتىپ، ءوز توبىندا كوش باستادى
پورتۋگاليا فۋتبولشىلارى بۇل بىرىنشىلىككە ۇلكەن ۇمىتپەن كەلدى. اسىرەسە، «التىن دوپتىڭ» بەس دۇركىن يەگەرى، 37 جاستاعى كريشتيانۋ رونالدۋ ءۇشىن بۇل سوڭعى مۇمكىندىك دەۋگە بولادى. وسىعان 2016 -جىلعى ەۋروپا چەمپيوناتىندا ۇزدىك شىققان پورتۋگاليالىقتاردىڭ الەم بىرىنشىلىكتەرىندە پالەندەي جولى بولماي كەلەدى. ولاردىڭ ەنشىسىندە 1966 -جىلعى دودانىڭ قولا جۇلدەسى عانا بار. سوندىقتان فەرناندۋ سانتۋشتىڭ شاكىرتتەرى بارىن سالاتىنى انىق.
ءبىر قىزىعى، وسى ايتۋلى جارىس كەزىندە اعىلشىندىق «مانچەستەر يۋنايتەد» كلۋبى ك. رونالدۋمەن كەلىسىمشارتتى ۇزگەن ەدى. ءسويتىپ كريشتيانۋ - قازىر الەم چەمپيوناتىنداعى كلۋبى جوق جالعىز ويىنشى.
پورتۋگاليا مەن گانانىڭ 2014 -جىلى ا ق ش-تا وتكەن الەم چەمپيوناتىندا جولدارى توقايلاسىپ، ەكەۋى دە توپتان شىعا الماعان ەدى. پلەي- وفقا وندا گەرمانيا مەن ا ق ش جولداما الدى. ءوزارا كەزدەسۋدە پورتۋگاليالىقتار گانالىقتاردى 2:1 ەسەبىمەن تىزە بۇكتىرىپ، جەڭىس گولىن رونالدۋ سوققان بولاتىن.
بۇل جولى دا ءبىرىنشى تايمدا ويىن تىزگىنىن بىردەن قولعا العان پورتۋگاليالىقتاردىڭ، سونىڭ ىشىندە كريشتيانۋدىڭ گول سوعاتىنداي بىرنەشە مۇمكىندىگى بولدى.
ەكىنشى كەزەڭدە امەريكالىق تورەشى يسمايل ەلفات گانالىق قورعاۋشى موحاممەد ساليسۋ رونالدۋدى ءوز ايىپ الاڭىندا شالىپ جىقتى دەپ ەسەپتەپ، 62-مينۋتتا پەنالتي بەلگىلەدى. كريشتيانۋ 11 مەترلىك نۇكتەدەن ءمۇلت كەتكەن جوق - 1:0.
گانالىقتار دا قاراپ قالماي، 73-مينۋتتا سول قاپتالدان سۋىرىلىپ شىققان موحاممەد كۋدۋستان پاس العان كوماندا كاپيتانى اندرە ايۋ تارازى باسىن تەڭەستىرىپ كەتتى - 1:1.
دەگەنمەن 78-مينۋتتا پورتۋگاليانىڭ تاعى ءبىر جۇلدىزى جواۋ فەليكس كومانداسىن قايتادان العا شىعاردى. ال ارادا ەكى مينۋت وتكەندە، الاڭعا تىڭنان قوسىلعان رافاەل لەاۋ ەسەپتى 3:1 گە جەتكىزدى. بۇل جەردە برۋنۋ فەرناندەشتىڭ قاتارىنان ەكىنشى رەت ناتيجەلى پاس بەرگەنىن ايتا كەتۋ كەرەك. الايدا 89-مينۋتتا ابدۋل راحمان بابا سول قاناتتا جواۋ كانسەلۋدى الداپ ءوتىپ، ءدال پاس بەردى. مۇنى ەكىنشى تايمدا ويىنعا قوسىلعان وسمان بۋكاري ءمۇلت جىبەرگەن جوق - 2:3. گانالىقتار قانشا تىرىسقانىمەن، بۇدان ارىگە شاماسى جەتپەدى.
اسا تارتىستى وتكەن باسەكە 3:2 ەسەبىمەن ەۋروپالىقتاردىڭ پايداسىنا شەشىلدى.
وسىلايشا، H توبىندا پورتۋگاليا ءۇش ۇپايمەن كوش باستادى. مۇنىڭ الدىندا تەڭ ويناعان ۋرۋگۆاي مەن وڭتۇستىك كورەيانىڭ ءبىر- بىردەن ۇپايى بار. 28-قاراشا كۇنى وتەتىن وڭتۇستىك كورەيا - گانا، پورتۋگاليا - ۋرۋگۆاي ماتچتارى ءبىراز ماسەلەنى شەشىپ تاستاۋى ابدەن ىقتيمال.
ەسكە سالا كەتەيىك، بۇدان بۇرىن يسپانيانىڭ كوستا-ريكانى 7:0 ەسەبىمەن ويسىراتا جەڭگەنىن، بەلگيانىڭ كانادا قۇراماسىن قاپى قالدىرعانىن جازعان بولاتىنبىز.
سونداي-اق يسپانيا دوپتى ۇستاۋ جونىنەن الەم چەمپيوناتتارىنىڭ رەكوردىن ورناتتى.
ۋرۋگۆاي مەن وڭتۇستىك كورەيا تەڭ ءتۇستى.