دوسىم سۇلەيەۆ بۇل ءاندى ماسكەۋ بولات جانە قورىتپالار ينستيتۋتىنىڭ اسپيرانتۋراسىندا وقىپ جۇرگەن كەزىندە شىعارعان.
«ءبىزدىڭ انسامبل مۇشەلەرىنىڭ بارلىعى دەرلىك وزدەرىنىڭ قىزمەت باعىتىن تاڭداپ، ءتۇرلى سالالار بويىنشا جۇمىسقا كىرىسە باستادى. مەن عىلىم جولىن تاڭداپ، ماسكەۋ بولات جانە قورىتپالار ينستيتۋتىنىڭ اسپيرانتۋراسىنا ءتۇستىم. بۇل ۋاقىتتا انسامبل مۇشەسى قۇرماناي وماروۆا پەداگوگيكالىق جۇمىسقا، ال ءشارىپ وماروۆ پارتيالىق قىزمەتكە اۋىستى. ماسكەۋگە كەتىپ بارا جاتقانىمدا ونەردەن اجىراپ قالماس ءۇشىن ولار ماعان گيتارا سىيلاعان بولاتىن. ارينە، اسپيرانتۋرادا وقي ءجۇرىپ، ءان جازۋدى جالعاستىردىم. ول كەزدەردە «توي جىرى»، «الماتى ءتۇنى» سياقتى اندەرىم تانىلا باستاعان ەدى»، - دەپ ەسكە الدى دوسىم سۇلەيەۆ.
ايتۋىنشا، وعان تۋعان باۋىرلارىنداي بولىپ كەتكەن انسامبل مۇشەلەرىنەن الىستاپ، ماسكەۋگە اتتانعان العاشقى كەزەڭ قيىن بولعان.
«بۇل كەزەڭ جۇرەگىمدە، جالپى ىشكى جان-دۇنيەمدە ۇلكەن ءىز قالدىردى. العاشقى ايلاردا قاتتى قينالدىم. اسىرەسە، عىلىممەن اينالىسۋ وڭايعا سوقپادى. وسىنداي ساتتەردە گيتارانى قولعا الىپ، شابىتتانىپ، ءان شىعاراتىنمىن. وسىلايشا، «جان دوسىم» ءانى جازىلدى»، - دەيدى ول.
كەيىن دوسىم سۇلەيەۆ «جان دوسىمنىڭ» اۋەنىن نوتاعا ءتۇسىرىپ، الماتىداعى انسامبل مۇشەلەرىنە جولداعان.
«ءبىزدىڭ انسامبل ماسكەۋ ارقىلى چەحوسلوۆاكيادا وتەتىن قويىلىمعا باراتىن بولدى. جولاي مەن وقىعان ۋنيۆەرسيتەتتە ارنايى كونسەرت ۇيىمداستىردى. عىلىمي جەتەكشىممەن، پروفەسسورلارمەن، اكادەميكتەرمەن، ستۋدەنتتەرمەن بىرگە الدىڭعى قاتاردا وتىردىم. انسامبل ءوز رەپەرتۋارىنداعى اندەردى ورىنداپ جاتتى. كەنەت: «قۇرمەتتى كورەرمەندەر، تاعى ءبىر ءان! بۇل - دوسىم سۇلەيەۆتىڭ «جان دوسىم» ءانى!» - دەپ جاريالادى. مەن بۇعان دەيىن ولاردىڭ ورىنداۋىندا بۇل ءاندى ەستىگەن ەمەسپىن. سودان كەيىن قۇرماناي ساحناعا شىعىپ، «جان دوسىمدى» ايتا باستادى. كوڭىلىم بوساپ، كوزىمە جاس كەلدى. سودان بەرى بۇل ءان حالىق اراسىندا كەڭ تارالىپ، ونىڭ عۇمىرى ءالى كۇنگە دەيىن جالعاسىپ كەلەدى»، - دەدى تۋىندى اۆتورى.
ايتا كەتەيىك، ءدال وسى ءان جازىلعان دوسىم سۇلەيەۆتىڭ گيتاراسى 8-جەلتوقساندا ەلوردادا وتەتىن XIII قىسقى قايىرىمدىلىق بالىندا اۋكسيونعا قويىلادى.