كەلىسسوز قورىتىندىسىنا وراي كەپىلگەر ەلدەردىڭ بىرلەسكەن مالىمدەمەسىن ق ر سىرتقى ىستەر ءمينيسترىنىڭ ورىنباسارى ءادىل تۇرسىنوۆ جاريا ەتتى، دەپ حابارلايدى قازاقپارات ءتىلشىسى.
«ءبىرىنشى - 2022-جىلعى 19- شىلدەدە تەگەراندا وتكەن استانا پروتسەسىنىڭ كەپىلگەر ەلدەرىنىڭ ءۇشجاقتى سامميتى اياسىندا قول جەتكىزىلگەن ۋاعدالاستىقتاردى باسشىلىققا الا وتىرىپ، الەمدەگى جانە وڭىردەگى احۋالدى دامىتۋدى قاراستىرىپ، سيريا داعدارىسىن ورنىقتى رەتتەۋدى ىلگەرىلەتۋدە استانا پروتسەسىنىڭ جەتەكشى ءرولىن اتاپ ءوتتى. ەكىنشى - سيريا اراب رەسپۋبليكاسىنىڭ ەگەمەندىگىنە، تاۋەلسىزدىگىنە، بىرلىگى مەن اۋماقتىق تۇتاستىعىنا، سونداي-اق ب ۇ ۇ جارعىسىنىڭ ماقساتتارى مەن قاعيداتتارىنا ءوزىنىڭ وزگەرىسسىز بەرىلگەندىگىن راستادى جانە بۇل قاعيداتتاردىڭ جالپىعا بىردەي ساقتالۋى مەن قۇرمەتتەلۋىنە جاتاتىنىن اتاپ ءوتتى»، - دەلىنگەن ءادىل تۇرسىنوۆ جاريالاعان بىرلەسكەن مالىمدەمەدە.
ۇشىنشىدەن، ونىڭ اتاپ وتۋىنشە، تاراپتار تەرروريزمگە قارسى كۇرەستىڭ بارلىق نىساندارى مەن كورىنىستەرىندە ءوزارا ءىس-قيمىلدى جالعاستىرۋعا جانە سيريانىڭ ەگەمەندىگى مەن اۋماقتىق تۇتاستىعىنا نۇقسان كەلتىرۋگە باعىتتالعان ءارى كورشى ەلدەردىڭ ۇلتتىق قاۋىپسىزدىگىنە، ونىڭ ىشىندە ترانسشەكارالىق شابۋىلدار مەن ينفيلتراتسياعا قاۋىپ توندىرەتىن سەپاراتيستىك جوسپارلارعا قارسى تۇرۋعا بەل بۋاتىنىن اتاپ وتكەن.
«ءتورتىنشى - يدليب دەەسكالاتسيا ايماعىنداعى جاعداي ەگجەي-تەگجەيلى قاراستىرىلدى. گۋمانيتارلىق احۋالدى قوسا العاندا، يدليب دەەسكالاتسيا ايماعىنداعى جانە ونىڭ اينالاسىنداعى جاعدايدى تۇراقتى قالىپقا كەلتىرۋدى قامتاماسىز ەتۋ ءۇشىن ودان ءارى كۇش سالۋعا كەلىستى. ي د ل ي ب تۋرالى بۇكىل كەلىسىمدى تولىق ورىنداۋ ارقىلى «جەردە» تىنىشتىقتى ساقتاۋ قاجەتتىگىن اتاپ ءوتتى»، - دەدى ول.