ورتالىق كوممۋنيكاتسيالار قىزمەتىندە بولعان بريفينگ بارىسىندا مەملەكەتتىك كىرىستەر كوميتەتى ءتوراعاسىنىڭ ورىنباسارى باقىتجان سلياموۆ وسىلاي مالىمدەدى، دەپ حابارلايدى قازاقپارات ءتىلشىسى.
«مەملەكەتتىك كىرىستەر كوميتەتى ۇلتتىق قاۋىپسىزدىك كوميتەتىنىڭ شەكارا قىزمەتىمەن بىرلەسىپ، 2022-جىلعى 23- قاراشادان باستاپ قىتايمەن شەكارادا «دوستىق» اۆتوموبيل وتكىزۋ پۋنكتىندە ەلەكتروندى كەزەكتىڭ اۆتوماتتاندىرىلعان جۇيەسىن پيلوتتىق ىسكە قوسۋ جوسپارلانىپ وتىر. ول ءۇشىن مەملەكەتتىك ورگاندار قازاقستاننان شىققان كەزدە اۆتوموبيل كولىك قۇرالدارىن وتكىزۋدى ۇيىمداستىرۋدىڭ ۋاقىتشا سحەماسىن بەكىتتى. اعىمداعى جىلدىڭ 23- قاراشاسىنان باستاپ مۇندا «Qoldau.kz» پلاتفورماسىنىڭ نەمەسە «sargoruqsat» ءموبيلدى قوسىمشاسىنىڭ اۆتوماتتاندىرىلعان ەلەكتروندىق كەزەك جۇيەسى پايدالانىلاتىن بولادى»، - دەپ اتاپ ءوتتى ول.
ونىڭ مالىمدەۋىنشە، ەلەكتروندى كەزەك جۇيەسىن قۇرۋدىڭ ماقساتى - كولىك قۇرالدارىنىڭ، جۇكتەر مەن تاۋارلاردىڭ وتكىزۋ پۋنكتىنە كىرۋ كەزەكتىلىگىن قالىپتاستىرۋ جانە بۇل پروتسەستىڭ اشىقتىعىن قامتاماسىز ەتۋ.
«باعدارلامانى قولدانۋ وتە وڭاي. ماسەلەن، جۇرگىزۋشى پورتال نەمەسە موبيلدى قوسىمشاعا تىركەلىپ، كەيىن جول ءجۇرۋ ءۇشىن بوس كۇن مەن ۋاقىتتى تاڭدايدى. ارتىنشا وعان ءوز كەزەگى تۋرالى SMS- حابارلاما جولدانادى»، - دەيدى باقىتجان سلياموۆ.
كوميتەت دەرەگىنشە، اتالعان ىلكى جوبانىڭ قورىتىندىسى نەگىزىندە مەملەكەتتىك شەكارانىڭ بارلىق پەريمەترى بويىنشا ەلەكتروندى كەزەك جۇيەسى كەزەڭ-كەزەڭىمەن ەنگىزىلەدى.