رەسەيلىكتەردىڭ كوپتەپ كەلۋى ەل ەكونوميكاسىنا قالاي اسەر ەتتى

استانا. قازاقپارات - ۇلتتىق ەكونوميكا ءمينيسترى الىبەك قۋانتىروۆ ءماجىلىس كۋلۋارىندا رەسەيدەگى ءىشىنارا اسكەرگە جۇمىلدىرۋ كەزىندەگى كوشتىڭ ەكونوميكاعا قالاي اسەر ەتكەنىن ايتتى، دەپ حابارلايدى قازاقپارات ءتىلشىسى.

«رەسەيدە ءىشىنارا موبيليزاتسيا جاريالانعانىنا 2 اي ءوتتى. بۇل جاعداي قازاقستان ەكونوميكاسىنا قالاي اسەر ەتتى؟ جاعىمدى جانە جاعىمسىز جاقتارىن ايتىپ بەرسەڭىز. سالدارى بولدى ما؟» - دەپ سۇرادى جۋرناليست.

«ازىرشە ونىڭ جاعىمسىز جاعىن ايتا المايمىن. بۇعان دەيىن مۇنىڭ ۋاقىتشا قۇبىلىس ەكەنىن ايتقان ەدىم. شىنىندا سولاي بولدى. موبيليزاتسيانىڭ العاشقى ەكى اپتاسىندا 200 مىڭ رەسەيلىك ءبىزدىڭ ەلدەن شىعىپ كەتتى. ولار قازاقستان اۋماعىن ترانزيت رەتىندە پايدالانعان. قالعاندارى ەلدە 90 كۇن بولا الادى. ولاردىڭ وسىنداي قۇقىعى بار.

اۋەلدە الەۋمەتتىك ينفراقۇرىلىمعا سالماق ءتۇستى. كەيىن ول ماسەلە شەشىلدى. قازاقستان ءوزىنىڭ قوناقجايلىعىن كورسەتتى»، - دەدى مينسيتر.

ونىڭ پايىمىنشا، اتالعان قۇبىلىستىڭ قازاقستان ءۇشىن جاعىمدى جاعى دا بولعان.

«مەنىڭشە، جوعارى بىلىكتى مامانداردى تالاپ ەتەتىن سالالاردا ءادىل باسەكەلەستىك كۇشەيدى. مىسالعا IT سالاسىن الۋعا بولادى. كوروناۆيرۋس پاندەمياسى بۇل سالانىڭ دامۋىنا سەرپىن بەردى. سونداي-اق بىزگە رەسەي، بەلارۋس جانە ۋكراينانىڭ IT ماماندارى اعىلدى. مەنىڭ ويىمشا، بۇل ەكونوميكانىڭ دامۋىنا وڭ اسەر ەتەدى. ونىڭ ىشىندە سيفرلاندىرۋ دا بار.

«سونىمەن قاتار، كورشى ەلدەن كەلگەن مۇنداي اعىنى ىشكى نارىقتاعى تۇتىنۋشىلىق سۇرانىسقا اسەرىن تيگىزەدى. ارينە، باعاعا اسەر ەتەدى. باسىندا دۇربەلەڭ بولدى. كەيىن جاعداي تۇراقتالدى. مەنىڭ ويىمشا، ساۋدا بالانسىنا دا وڭ اسەرىن تيگىزدى. ويتكەنى، ادامدار وسىندا كەلىپ، ءتۇرلى قىزمەتتەر مەن تاۋارلاردى ساتىپ الادى، دەمەك، بىزدەگى قىزمەتتەر ەكسپورتتالدى. ونى ءبىز وسىندا رەسەيلىكتەرگە ساتتىق. مۇنى ءوز اۋماعىمىزداعى قىزمەت كورسەتۋ ەكسپورتى دەيدى. بۇل دا جالپى ساۋدا بالانسىنا وڭ اسەرىن تيگىزدى»، - دەدى الىبەك قۋانتىروۆ.