پوليسيا بانكتەرگە پين- كودسىز تولەم جاساۋ فۋنكسياسىن الىپ تاستاۋدى ۇسىندى

بۇل تۋرالى ب ا ق وكىلدەرىنىڭ قاتىسۋىمەن وتكەن بريفينگتە الماتى اۋداندىق پوليتسيا باسقارماسى باسشىسىنىڭ ورىنباسارى مارات ومىربايەۆ ايتتى، دەپ حابارلايدى قازاقپارات ءتىلشىسى.

«تالداۋ كورسەتكەندەي، قىلمىستاردىڭ 33,3 پايىزى جەكە مۇلىكتى ۇرلاۋعا قاتىستى. الماتى اۋدانى بويىنشا اتالعان قىلمىستار سانىنىڭ 60 قا نەمەسە 4,6 پايىزعا وسكەنى بايقالدى. ياعني، وتكەن جىلدىڭ سايكەس كەزەڭىندە جەكە مۇلىك بويىنشا 1308 ۇرلىق فاكتىسى تىركەلسە، بيىل 1368 قىلمىس تىركەلدى. مۇلىكتى ۇرلاۋ قىلمىستارىنىڭ كوبىن (d) باسقا وڭىرلەردەن كەلگەندەر جاسايدى»، - دەدى مارات ومىربايەۆ.

ونىڭ ايتۋىنشا، بيىل ەلورداداعى ءىرى ساۋدا جەلىلەرىندە دە ۇرلىق فاكتىلەرى ءجيى تىركەلگەن.

«ماسەلەن، «ماگنۋم» ساۋدا جەلىسى تاراپىنان 138 ارىز ءتۇستى. ولار بويىنشا 54 قىلمىستىق ءىس قوزعالدى. سونىمەن قوسا، «سمولل» سۋپەرماركەتىندە – 16، «ديونا» دۇكەنىندە – 42، «سپورت ماستەر» جەلىسىندە 34 ۇرلىق فاكتىسى تىركەلدى»، - دەپ توقتالدى ول.

بۇدان وزگە، 114 بانك كارتالارى ۇرلانعان. تيىسىنشە، قولدى بولعان كارتالار ارقىلى ترانزاكسيالار مەن تولەمدەر جاسالعان.

«بۇل فاكتىلەر سوتقا دەيىنگى تەرگەپ- تەكسەرۋدىڭ ءبىرىڭعاي رەەسترىنە ەنگىزىلدى. ۇرلىقتىڭ بۇل ءتۇرىنىڭ الدىن الۋ ءۇشىن ءبىز ەكىنشى دەڭگەيدەگى بانكتەرگە پين- كودتى ەنگىزبەستەن تولەم جاساۋ، رانزاكسيالار جۇرگىزۋ فۋنكسياسىن الىپ تاستاۋ تۋرالى ۇسىنىس دايىندادىق»، - دەپ ءمالىم ەتتى مارات ومىربايەۆ.