م. اۋەزوۆ اتىنداعى جوعارى وقۋ ورنىنا زەرتتەۋ ۋنيۆەرسيتەتى مارتەبەسى بەرىلەدى

استانا. قازاقپارات - م. اۋەزوۆ اتىنداعى وڭتۇستىك قازاقستان ۋنيۆەرسيتەتىنە زەرتتەۋ ۋنيۆەرسيتەتى مارتەبەسى بەرىلۋى مۇمكىن. «اشىق» ن ق ا پورتالىندا جاريالانعان ۇكىمەت قاۋلىسىندا وسىنداي ۇسىنىس جازىلعان، دەپ حابارلايدى قازاقپارات ءتىلشىسى.

«م. اۋەزوۆ اتىنداعى وڭتۇستىك قازاقستان ۋنيۆەرسيتەتى كوممەرتسيالىق ەمەس اكسيونەرلىك قوعامىنا زەرتتەۋ ۋنيۆەرسيتەتى مارتەبەسى بەرىلسىن.

وقۋ ورنىن زەرتتەۋ ۋنيۆەرسيتەتىنە اينالدىرۋ جانە ج و و- دا جاڭا يننوۆاتسيالىق زەرتتەۋ ەكوجۇيەسىن قۇرۋ عىلىمي-زەرتتەۋ قىزمەتىن قارقىنداتۋدى جانە دامىتۋدى، باسىم دامۋ باعىتتارىن كادرلىق قامتاماسىز ەتۋدى جانە ۋنيۆەرسيتەتتىڭ عىلىمي-ءبىلىم بەرۋ قىزمەتىن ينفراقۇرىلىمدىق قامتاماسىز ەتۋدى تۇبەگەيلى وزگەرتۋدى قاجەت ەتەدى.

وسى ماقساتتارعا قول جەتكىزۋ ءۇشىن قازاقستان رەسپۋبليكاسىنىڭ 2025-جىلعا دەيىنگى ۇلتتىق دامۋ جوسپارىنىڭ، قازاقستان رەسپۋبليكاسىنىڭ يندۋستريالىق- يننوۆاتسيالىق دامۋىنىڭ 2020-2025 -جىلدارعا ارنالعان مەملەكەتتىك باعدارلاماسىنىڭ، ساپالى ءبىلىم بەرۋ «ءبىلىمدى ۇلت» ۇلتتىق جوباسىنىڭ، قازاقستان رەسپۋبليكاسىنىڭ عىلىمىن دامىتۋدىڭ 2022-2026-جىلدارعا ارنالعان تۇجىرىمداماسىنىڭ، «سيفرلاندىرۋ، عىلىم جانە يننوۆاتسيا ەسەبىنەن تەحنولوگيالىق سەرپىلىس» ۇلتتىق جوباسىنىڭ جانە باسقا دا باعدارلامالىق قۇجاتتاردىڭ باسىمدىقتارىنا سايكەس جۇزەگە اسىرىلاتىن بولادى»، - دەپ كورسەتىلگەن عىلىم جانە جوعارى ءبىلىم مينيسترلىگى ۇسىنعان جاعدايدى تالداۋ قۇجاتىندا.

ءمالىم بولعانداي، وقۋ ورنىنا زەرتتەۋ مارتەبىسىن بەرۋ نەگىزىندە وندا حالىقارالىق ەڭبەك نارىعىنىڭ تالاپتارىنا ساي كەلەتىن قوس ديپلومدى ءبىلىم باعدارلاماسى ازىرلەنەدى.