بۇعان دەيىن ق ر ورتالىق سايلاۋ كوميسسياسى پرەزيدەنت سايلاۋىنىڭ الدىن الا ناتيجەسىن جاريالاعان ەدى.
«قازاقستان رەسپۋبليكاسىنداعى سايلاۋ تۋرالى كونستيتۋتسيالىق زاڭعا سايكەس، اۋماقتىق سايلاۋ كوميسسيالارى داۋىستار سانالعاننان كەيىن ەكى كۇن ىشىندە ءار ءوڭىر بويىنشا حاتتامالاردىڭ ءتۇپنۇسقالارىن جەتكىزۋگە ءتيىس. بيىلعى 20-قاراشادا وتكەن كەزەكتەن تىس پرەزيدەنتتىك سايلاۋدىڭ قورىتىندىلارى ورتالىق سايلاۋ كوميسسياسىنىڭ وتىرىسىندا بەكىتىلەدى، ونى وتكىزەتىن كۇن مەن ۋاقىت قوسىمشا حابارلاناتىن بولادى»، - دەدى نۇرلان ءابدىروۆ ورتالىق سايلاۋ كوميسسياسىندا وتكەن باسپا ءسوز ءماسليحاتىندا.
سونداي-اق، ن. ءابدىروۆ ورتالىق سايلاۋ كوميسسياسى مەن اۋماقتىق سايلاۋ كوميسسيالارىنىڭ اتىنا كەلىپ تۇسكەن رەسمي جانە بارلىق وتىنىشتەر زاڭنامادا بەلگىلەنگەن تارتىپپەن قارالاتىنىن ايتتى.
قازىرگى ۋاقىتتا ەل وڭىرلەرى مەن شەتەلدەردەگى سايلاۋ ۋچاسكەلەرىندە داۋىستاردى ساناۋ اياقتالدى. ازىرگە اۋماقتىق سايلاۋ كوميسسيالارى داۋىس بەرۋ ناتيجەلەرى تۋرالى حاتتامالاردىڭ ەلەكتروندى كوشىرمەلەرىن ۇسىنعان.
وسىلايشا و س ك ءتوراعاسىنىڭ ايتۋىنشا، ق. توقايەۆقا 6 ميلليون 456 مىڭ 392 سايلاۋشى نەمەسە ولاردىڭ %81,31 ى داۋىس بەرگەن. ەكىنشى ورىندا 460484 نەمەسە %5,8 داۋىسپەن «بارىنە قارسىمىن» باعانى تۇر.
سونىمەن بىرگە، جيگۋلي دايرابايەۆقا - 271641 ادام نەمەسە 3,42 پايىز، قاراقات ابدەنگە - 206 مىڭ 206 نەمەسە 2,6 پايىز، مەيرام قاجىكەنگە - 200907 نەمەسە 2,53 پايىز، نۇرلان اۋەسبايەۆقا - 176116 نەمەسە 2,22 پايىز جانە سالتانات تۇرسىنبەكوۆاعا - 168731 نەمەسە 2,12 پايىز داۋىس بەرىلگەن.
ايتا كەتەيىك، كەشە 20-قاراشادا ەلىمىزدە كەزەكتەن تىس پرەزيدەنت سايلاۋى ءوتتى. بارلىق وڭىردە 10033 ۋچاسكە جۇمىس ىستەدى. ال شەت مەملەكەتتەردەگى قازاقستان وكىلدىكتەرى جانىنداعى 68 ۋچاسكە قۇرىلعان.
ەلىمىزدەگى بۇكىل سايلاۋشىلاردىڭ 69 پايىزى نەمەسە 8 ميلليون 282 مىڭنان استام ادام ءوز تاڭداۋىن جاساعان.
سونىمەن بىرگە، تۇندە ەxit poll ادىستەمەسى بويىنشا جۇرگىزىلگەن ساۋالنامالاردىڭ العاشقى قورىتىندىلارى ءمالىم بولدى.