ش ى ۇ باس حاتشىسى قازاقستانداعى سايلاۋدان العان اسەرىن ءبولىستى

استانا. قازاقپارات - شاڭحاي ىنتىماقتاستىق ۇيىمىنىڭ باس حاتشىسى چجان مين قازاقستانداعى كەزەكتەن تىس پرەزيدەنت سايلاۋىنان العان اسەرىن ءبولىستى، دەپ حابارلايدى قازاقپارات ءتىلشىسى.

ش ى ۇ باس حاتشىسى بۇگىنگى سايلاۋدان ءۇش نەگىزگى ماسەلەنى بايقاعان.

«العاشقى اسەرىم - سايلاۋ جوعارى دەڭگەيدە ۇيىمداستىرىلعان. بۇكىل ۋچاسكەلەردە بايقاۋشىلاردان دا، كوميسسيا مۇشەلەرىنەن دە «زاڭسىزدىق تىركەلدى مە؟» دەپ سۇرادىم. ءبارى «جوق» دەپ جاۋاپ بەردى. ءبىر كوميسسيا مۇشەسى وسىعان دەيىن ۋچاسكەلەردە تارتىپسىزدىك بولۋى مۇمكىن دەپ ويلاعانىن، ءبىراق ءبارى تىنىش بولعانىن ايتتى.

ەكىنشى ءبىر اسەرىم - كوميسسيا مۇشەلەرى دە، بايقاۋشىلار دا بۇل ىسكە ايرىقشا جاۋاپكەرشىلىكپەن قارايدى. سايلاۋ ۋچاسكەلەرىن كەشە ارالاپ باستاعانبىز. كەشە «تىنىشتىق كۇنى» بولدى. بۇكىل ۋچاسكەلەر ۇيىمداسقان تۇردە جۇمىس ىستەپ تۇردى. بۇگىن مەن بارعان سايلاۋ ۋچاسكەلەرىنىڭ بارىندە وكىلدەر وزدەرىن كاسىبي ۇستادى. داۋىس بەرۋشىلەردى تىركەۋ پروتسەدۋراسىن باقىلاپ كوردىم. تىركەۋ جەكە باستى كۋالاندىراتىن قۇجاتتى كورسەتۋدەن باستالادى ەكەن. كەيىن ونى قۇجات بويىنشا تىزىمنەن ىزدەدى. وسىدان كەيىن ۋچاسكەدەگى قىزمەتكەر داۋىس بەرۋ بيۋللەتەنىن بەرىپ، ول ونىڭ اياق جاعىنا قول قويدى. وسىنىڭ ءبارىن بايقاۋشىلاردىڭ ءبارى ءجىتى قاداعالاپ وتىردى. ءتۇرلى سايلاۋ ۋچاسكەلەرىندە بايقاۋشىلاردىڭ سانى ءار ءتۇرلى بولدى. ءبىراق ءبارى ءوز ورنىندا وتىردى»، - دەدى چجان مين.

ونىڭ پايىمىنشا، قازاقستاندىقتاردىڭ سايلاۋعا بەلسەندى قاتىسۋى - ولاردىڭ ەل بولاشاعىنا سەنىمى زور ەكەنىن كورسەتەدى.

«ءۇشىنشى بايقاعانىم - داۋىس بەرۋشىلەر بەلسەندىلىك تانىتتى. اقمولا وبلىسىندا ساعات 11.00 گە دەيىن سايلاۋشىلاردىڭ 60 پايىزعا جۋىعى داۋىس بەرىپ قويدى. استانا قالاسىنىڭ كەي ۋچاسكەلەرىندە ءبىرقاتار سايلاۋشىلاردىڭ جاسقا تولماعان بالاسىن كوتەرىپ كەلگەنىن كوردىم. ولار بالالارىنا سايلاۋ پروتسەسىن باستان اياق كورسەتىپ ءجۇردى. بالالارىن وسى پروتسەستى بىرگە اتقارۋعا شاقىرىپ جاتتى. ياعني، تۇرعىندار بالالارىن جاۋاپتى ازامات ەتىپ تاربيەلەگىسى كەلەدى. مەنىڭ ويىمشا، ولاردىڭ وتباسىمەن كەلۋى ءوز وتانىنىڭ بولاشاعىنا دەگەن سەنىمىن كورسەتەدى. بۇل - مەنىڭ بايقاۋ كەزىندە العان اسەرىم. مەنىڭ ارىپتەستەرىم سايلاۋ كۇنىنىڭ سوڭىنا دەيىن، ساعات 20.00 گە دەيىن ۋچاسكەلەردە بايقاۋ جۇرگىزەدى»، - دەدى شاڭحاي ىنتىماقتاستىق ۇيىمىنىڭ باس حاتشىسى.

ورتالىق سايلاۋ كوميسسياسىنىڭ بەرگەن مالىمەتىنە سۇيەنسەك، ەلىمىزدە داۋىس بەرۋ قۇقىعى بار 11827277 ازامات تىركەلگەن.

ولار رەسپۋبليكا اۋماعىندا ورنالاسقان 10101 سايلاۋ ۋچاسكەسىندە داۋىس بەرەدى.

ال 53 شەت مەملەكەتتەگى 68 ۋچاسكەدە 12527 قازاقستان ازاماتىنا داۋىس بەرۋ مۇمكىندىگى جاسالعان.

بۇعان دەيىن و س ك كەزەكتەن تىس پرەزيدەنت سايلاۋىنىڭ بارىسىن 641 حالىقارالىق بايقاۋشى قاداعالايتىنىن ءمالىم ەتكەن ەدى.