الماتىدا ءبىر توپ تانىمال ونەر ادامدارى، جازۋشى، سپورتشىلار داۋىس بەردى
الماتىنىڭ №622 سايلاۋ ۋچاسكەسىندە داۋىس بەرگەن قازاقستاننىڭ حالىق ءارتىسى، كينو جانە تەاتر اكتەرى، كينورەجيسسەر دوسحان جولجاقسىنوۆ قازاقستاندىقتاردى بەلسەندى بولۋعا شاقىردى.
«قادىرلى اعايىن، بۇگىنگى كۇن - مەملەكەتىمىز ءۇشىن، ەلىمىز ءۇشىن ەڭ ءبىر ماڭىزدى كۇندەردىڭ ءبىرى. ءبىز اتا- بابامىزدىڭ اماناتىن ارقالاعان ەلمىز. كەلەشەك ۇرپاقتىڭ ارمان- مۇددەسىنە جاۋاپتى ەلمىز. سوندىقتان كەلىپ، ءوز ۇمىتكەرلەرىڭىزدى تاڭداڭىزدار، داۋىس بەرىڭىزدەر. مەندە ءوز داۋسىمدى بەردىم»، - دەدى ول.
الماتىدا «دوس- مۇقاسان» ءانسامبلىنىڭ ءسوليسى مۇرات قۇسايىنوۆتىڭ پىكىرىنشە، ەلگە ساياسي وزگەرىستەر قاجەت. سايلاۋدان كەيىنگى وزگەرىستەر قوعامدىق- ساياسي ءومىردىڭ بارلىق سالاسىنا اسەر ەتەدى.
«اتاپ ايتقاندا، ەكونوميكالىق ءوسىپ ارتىپ، جاڭا الەۋمەتتىك باعدارلامالار پايدا بولادى»، - دەدى كومپوزيتور.
ءانشى مۇقاسان شاحزادايەۆ تە داۋىس بەردى.
«ءبىز تۇرعىلىقتى مەكەنجاي بويىنشا №157 سايلاۋ ۋچاسكەسىندە ءوز تاڭداۋىمىزدى جاسادىق. جاڭادان سايلانعان مەملەكەت باسشىسى حالىقتىڭ الەۋمەتتىك- ەكونوميكالىق ءال- اۋقاتىن ارتتىرۋعا ۇلەس قوسادى دەپ ۇمىتتەنەمىز»، - دەدى ق ر ەڭبەك سىڭىرگەن قايراتكەرى مۇقاسان شاحزادايەۆ.
سونداي- اق، ءجاميلا سەركەبايەۆا دا № 254 سايلاۋ ۋچاسكەسىندە داۋىس بەردى.
«بۇگىن ۇلتتىق كىتاپحاناداعى ءوزىمنىڭ ۋچاسكەمە باردىم. داۋىسىمدى بەرە وتىرىپ، ەلىمىزدە ءارقاشان بەيبىتشىلىك بولادى دەپ ۇمىتتەنەمىن. ءبىز وركەنيەتتى ەلدەردىڭ قاتارىنا كىرۋگە تىرىسامىز. ەلىمىز كوپۇلتتى، بۇل وتانىمىزدىڭ جانە مەنىڭ ينتەرناتسيونالدى وتباسىمنىڭ ەرەكشەلىگى. مەملەكەت داميدى، ورتاق مادەنيەت ارتادى ءارى جاقسى جاققا قاراي وزگەرىستەر بولادى دەپ ۇلكەن ءۇمىت ارتامىن»، - دەدى ق ر ەڭبەك سىڭىرگەن قايراتكەرى ءجاميلا سەركەبايەۆا.
ال ماقپال ءجۇنىسوۆا پرەزيدەنت سايلاۋىنا قىزىمەن بىرگە كەلدى.
ودان بولەك، الماتىداعى №301 سايلاۋ ۋچاسكەسىندە جازۋشى، مەملەكەتتىك سىيلىقتىڭ لاۋرەاتى نۇرلان ورازالين دا داۋىس بەردى.
«ەلىمنىڭ ىرگەسى شايقالماسىن، مىقتى بولسىن، ءبىراۋىزدى بولايىق، ۇرپاعىمىز اقىلدى بولسىن، بولاشاعىمىز بەكەم بولسىن دەگەن ءوزىمنىڭ جۇرەك قالاۋىممەن كەلگەن داۋسىمدى بەردىم. ۇرپاعىما بولاشاقتى قامتاماسىز ەتەتىن قازاقستانعا داۋىس بەرۋ ءۇشىن كەلدىم»، - دەدى اقىن، مەملەكەت جانە قوعام قايراتكەرى نۇرلان ورازالين.
سونىمەن قاتار، قازاقستاننىڭ ەڭبەك سىڭىرگەن ءارتىسى باقتيار تايلاقبايەۆتا الماتىدا ءوزىنىڭ ازاماتتىق بورىشىن ورىندادى.
«سايلاۋدا ءبىز رەسپۋبليكانىڭ الەۋمەتتىك، يدەولوگيالىق جانە ەڭ باستىسى ەكونوميكالىق دامۋىن قامتاماسىز ەتەتىن ەلدىڭ لايىقتى كوشباسشىسىن انىقتايتىنىمىزعا سەنىمدىمىن. بۇل ءبىزدىڭ مەملەكەتىمىز ءۇشىن وتە ماڭىزدى. مەن ەلىمىزدىڭ بولاشاعى ءۇشىن ءوز داۋىسىمدى بەردىم، - دەدى باقتيار تايلاقبايەۆ.
الماتىدا سپورتشىلار دا ساياسي بەلسەندىلىك تانىتىپ جاتىر.
بىلعارى قولعاپ شەبەرى نازىم قىزايباي «اقجار» شاعىن اۋدانىنداعى №186 ورتا مەكتەپتە ورىن تەپكەن №515 سايلاۋ ۋچاسكەسىنە بارىپ، قازاقستان پرەزيدەنتىن سايلاۋعا ۇلەس قوستى.