لوندوندا قازاقستاندىقتار داۋىس بەرىپ جاتىر
244№ سايلاۋ ۋچاسكەسى قازاقستاننىڭ ۇلى بريتانياداعى ەلشىلىگىنىڭ عيماراتىندا ورنالاسقان.
ۋچاسكە قاجەتتى قۇرال-جابدىقتارمەن تولىق قامتاماسىز ەتىلگەن. سونداي-اق بۇل جەردە كانديداتتار تۋرالى جازىلعان اقپارات تاقتايشاسى دا تۇر. سايلاۋشىلاردىڭ قاتارىندا تەك ۇلى بريتانيا قازاقتارى عانا ەمەس، يسلانديا، يرلانديا مەملەكەتتەرىندە ۋاقىتشا نەمەسە تۇراقتى تۇرىپ جاتقان وتانداستارىمىز دا بار. داۋىس بەرۋشىلەر اراسىندا تۋريستەر دە كوپ. ۇلى بريتانيادا ساياحاتتاپ جۇرگەن قازاقستاندىقتار ازاماتتىق بورىشتارىنا جاۋاپكەرشىلىكپەن قاراپ، ەلشىلىككە كەلىپ جاتىر.
«بۇگىن لوندون ۋاقىتى بويىنشا تاڭعى ساعات 7:00 دە 244- سايلاۋ ۋچاسكەسى ءوز جۇمىسىن باستادى. ۇلى بريتانيا جانە سولتۇستىك يرلانديا كورولدىگى اۋماعىندا ۋاقىتشا نەمەسە تۇراقتى تۇراتىن ازاماتتارىمىز ءبىزدىڭ ۋچاسكەگە كەلىپ، داۋىس بەرە الادى. سايلاۋ ۋچاسكەسى جەرگىلىكتى ۋاقىت بويىنشا كەشكى ساعات 8 گە دەيىن جۇمىس ىستەيدى. سول ۋاقىتقا دەيىن جارامدى پاسپورتى بار قازاقستان رەسپۋبليكاسىنىڭ ءاربىر ازاماتى كەلىپ ءوز تاڭداۋىن جاساي الادى»، دەيدى سايلاۋ ۋچاسكەسى كوميسسياسىنىڭ ءتوراعاسى ميراز اڭدابايەۆ.
«مەن بولاشاق باعدارلاماسى بويىنشا لوندون ۋنيۆەرسيتەتىندە وقىپ جاتىرمىن. بۇگىن ەلشىلىككە ءوزىمنىڭ ساياسي كوزقاراسىمدى ءبىلدىرۋ ءۇشىن ارنايى كەلىپ تۇرمىن. مەنىڭ ويىمشا، ءاربىر قازاقستان ازاماتى، اسىرەسە جاستار ءۇشىن ساياسي بەلسەندىلىك تانىتۋ ماڭىزدى ءىس بولىپ تابىلادى»، دەيدى UCL ۋنيۆەرسيتەتىنىڭ ماگيسترانتى نازىم شايحينا.
ايتا كەتۋ كەرەك، سايلاۋ تۋرالى اقپارات جاريالانعان ساتتەن باستاپ، 300 دەي ادام ساياسي ناۋقانعا قاتىسۋعا نيەت بىلدىرگەن. ءبىراق سايلاۋشىلاردىڭ سانى ودان دا كوپ بولۋى مۇمكىن. ويتكەنى الدىن-الا تىركەلمەي-اق ءتولقۇجات كورسەتىپ، داۋىس بەرۋگە شەكتەۋ جوق. ەلشىلىك قىزمەتكەرلەرى سايلاۋشىلاردىڭ قاۋىپسىزدىگىن قامتاماسىز ەتۋ ماقساتىندا جەرگىلىكتى پوليتسيامەن تىعىز جۇمىس ىستەپ جاتىر. بۇدان بولەك باقىلاۋشىلار سايلاۋدىڭ ءادىل، اشىق جانە حالىقارالىق ستاندارتتارعا ساي ءوتۋىن قاداعالاۋدا. ۋچاسكە جابىلعاننان كەيىن 1-2 ساعاتتىڭ كولەمىندە لوندونداعى پرەزيدەنتتىك سايلاۋ ناتيجەلەرى بەلگىلى بولىپ، ورتالىققا جىبەرىلەدى.