تەمىرتاۋلىق ەگىز بويجەتكەن: كىمگە داۋىس بەرگەنىمىزدى ءبىر- بىرىمىزگە دە ايتپايمىز

تەمىرتاۋ. قازاقپارات - مەتاللۋرگتەر قالاسىندا ەگىز بويجەتكەن سايلاۋ ۋچاسكەسىنە كەلىپ، داۋىس بەردى.

مەتاللۋرگتەر قالاسىندا بيىل 18 جاسقا تولعان 2 مىڭنان استام جاس تۇرعىن تىزىمگە ەندى، دەپ حابارلايدى قازاقپارات ءتىلشىسى.

ابزال ەرمەكبايەۆ بيىل العاش رەت سايلاۋعا قاتىستى. ول - تەمىرتاۋ پوليتەحنيكالىق كوللەدجىنىڭ ستۋدەنتى.

ابزال تۇرعىلىقتى جەرى بويىنشا № 317 ۋچاسكەدە ءوزىنىڭ ازاماتتىق بورىشىن ورىنداعان.

«بۇگىنگى ءىس- شارا وتە ماڭىزدى. اركىم كەلىپ، داۋىس بەرۋى كەرەك. مەنىڭ قۇرداستارىم مەن تۋىستارىم بۇگىن كەلىپ، قازاقستاننىڭ بولاشاعى ءۇشىن داۋىس بەرەدى» ، - دەيدى ابزال ەرمەكبايەۆ.

№ 317 ۋچاسكە ءوزىنىڭ سايلاۋ الدىنداعى جۇمىسىن 20-قازاندا باستاعان.

وعان ەكى مىڭنان استام ادام بەكىتىلگەن. كۇنى بويى داۋىس بەرۋشىلەردىڭ كەلۋى 85% قۇرايدى دەپ جوسپارلانۋدا.

زەينەتكەرلەر مەن مۇمكىندىگى شەكتەۋلى جاندار ءۇشىن كوشپەلى بريگادالار ۇيىمداستىرىلدى.

«بۇگىنگى تاڭدا 11 بايقاۋشى وتىر. بارلىعى كوتەرىڭكى كوڭىل- كۇيمەن كەلىپ جاتىر، اۋا رايى دا كەرەمەت. ءبىر ساعات ىشىندە 100 دەن استام ادام داۋىس بەردى. سايلاۋ الدىنداعى ۇگىت ءبىر اي بويى وتە بەلسەندى ءجۇردى»، - دەپ اتاپ ءوتتى №317 ۋچاسكەلىك كوميسسيانىڭ ءتوراعاسى جومارت تىلەمىسوۆ.

ال №324 سايلاۋ ۋچاسكەسىنە ەگىز قىزدار امينا مەن ادينا يبرايەۆا كەلدى.

ولار وسىمەن ءۇشىنشى رەت داۋىس بەرۋگە قاتىسىپ وتىرعانىمەن، كىمگە داۋىس بەرگەنىن ءبىر- بىرىنەن قۇپيا ۇستايتىنىن ايتادى.

«سايلاۋعا قاتىسۋ - قازاقستاننىڭ ءاربىر ازاماتىنىڭ ازاماتتىق بورىشى دەپ سانايمىن. مەن ادال سايلاۋدى قولدايمىن جانە مەنىڭ تاڭداۋىم دۇرىس بولدى دەپ ۇمىتتەنەمىن»، - دەيدى امينا يبرايەۆا.

سايلاۋ كۇنى مەتاللۋرگتەر قالاسىندا 59 سايلاۋ ۋچاسكەسى جۇمىس ىستەيدى.

تەمىرتاۋ بويىنشا سايلاۋشىلار تىزىمىندە 18 جاسقا ەندى تولعان جاستاردىڭ سانى - 2175 ادام.