بۇركىتباي فايزوللا ۇلى بالا كەزدەن بابا مۇراسىن قاسيەت تۇتقان، جىلقىنىڭ تەكتىلىگىن، قىراننىڭ قىراعىلىعىن بويعا دارىتىپ، كورگەن-بىلگەنىن ىسكە جاراتا ءجۇرىپ، اتا كاسىپتىڭ ءتىلىن مەڭگەرگەن جان.
ونىڭ كۇمىس تۇياق تۇلپار باپتاپ، تازى ەرتىپ، قىلىش تۇمسىق، قايقى ءتوس قىران قۇس ۇشىرعان بەكزات بولمىسى، ۇلتتىق سالت-ءداستۇر، ونەر مەن كاسىپتى دارىپتەپ، ونى وسكەلەڭ ۇرپاققا ۇيرەتىپ جۇرگەن ۇستازدىق ۇلاعاتى بارلىق قۇرمەتكە لايىق.
قۇسبەگى، اتبەگى بۇركىتبايدىڭ ەسىمى تەك جەتىسۋ وڭىرىنە عانا ەمەس، اتا ءداستۇرى مەن كاسىبىن قۇرمەت تۇتاتىن قازاق جۇرتىنا ءمالىم.
ۇلى جاسۇلان اكە جولىن جالعاپ، بابى كەلىسكەن قىران قۇستارىن وڭىرلىك، رەسپۋبليكالىق ساياتشىلىق جارىستارىنا قوسىپ، ماڭدايى جارقىراپ جۇلدە الىپ ءجۇر. نەمەرەسى ءالعازيز دا اتا مەن اعا تالىمىنە دەن قويىپ، قۇس باپتاۋدىڭ قىر-سىرىن مەڭگەرۋدە.
«ەل تىزگىنىن سەنىپ تاپسىراتىن تۇلعانى سايلاۋدىڭ، ازاماتتىق پارىزدى وتەۋدىڭ ءمان-ماڭىزىن ءوسىپ كەلە جاتقان ۇرپاققا ۇعىندىرۋ ءۇشىن سايلاۋعا بالا-شاعامىزبەن بىرگە قاتىسىپ، ساياسي ناۋقانعا جاۋاپكەرشىلىكپەن قاراپ جاتىرمىز. قازاقستاننىڭ ءار ازاماتى ەل بولاشاعى ءۇشىن ماڭىزدى سايلاۋدان قالىس قالماۋعا ءتيىس دەپ بىلەمىن. ىرگەمىز بەرىك، بىرلىگىمىز بەكەم، تىرلىگىمىز بەرەكەلى بولسىن!» - دەدى اۋلەتتىڭ ارقاسۇيەر ابىز اتاسى بۇركىتباي فايزوللا ۇلى.