سايلاۋ كۇنىندە «جىبەك جولى» تەلەارناسى ارنايى ەفير شىعارادى
ۇلتتىق تەلەارنا ديرەكتورى كونستانتين حارلاموۆتىڭ ايتۋىنشا، وسى جەكسەنبىدە كورەرمەندى تالاي توسىنسىي كۇتىپ تۇر.
«ق ر پرەزيدەنتى تەلەراديوكەشەنى مەن «قازاقپارات» اگەنتتىگىندەگى ارىپتەستەرمەن بىرلەسە وتىرىپ، ەلدىڭ ءار تۇكپىرىنەن جانە ونداعان شەت مەملەكەتتەن تىكەلەي ەفيردە 20 ساعاتقا جۋىق حابار تاراتامىز. تەلەكورەرمەندەرگە حالىقتىڭ سايلاۋعا قالاي قاتىسىپ جاتقانى تۋرالى جەدەل دەرەكتەر بەرىلىپ، ساراپشىلار مەن ساياساتتانۋشىلار تەلەارنا ستۋدياسىنا قوناققا شاقىرىلادى. تىلشىلەرىمىز ورتالىق سايلاۋ كوميسسياسىنىڭ كەڭسەسىندە، رەسپۋبليكا بويىنشا سايلاۋ ۋچاسكەلەرىندە جۇمىس ىستەيدى. كورەرمەننىڭ سايلاۋ كۇنى تۋرالى شىنايى جانە تولىققاندى اقپارات الاتىنىنا كەپىلدىك بەرەمىز. قازاقستاندىقتاردى ەلىمىز ءۇشىن ماڭىزى زور تاريحي كۇندى بىزبەن بىرگە وتكىزۋگە شاقىرامىز»، - دەيدى Jibek Joly تەلەارناسىنىڭ باسشىسى.
وسى جەكسەنبىدە ارنانىڭ تىكەلەي ەفيرى تاڭەرتەڭ سايلاۋ ۋچاسكەلەرىنىڭ اشىلۋىمەن باستالىپ، دۇيسەنبىگە قاراعان ءتۇنى exit-poll قورىتىندىسىنىڭ الدىن الا مالىمەتتەرى جاريالانعاننان كەيىن اياقتالادى.
«حالىقتىڭ تەلەديدار ەكرانىنىڭ الدىندا 20 ساعات قاققان قازىقتاي تاپجىلماي وتىرا المايتىنىن تۇسىنەمىز. سوندىقتان ءبىزدىڭ تىكەلەي ەفيرلەردى قازاقستاندىقتار ءۇشىن اقپاراتتى الۋعا ىڭعايلى پلاتفورمالاردا قولجەتىمدى ەتەمىز. اتاپ ايتقاندا، الەۋمەتتىك جەلىلەردە، مەسسەندجەرلەردە، Youtube ۆيدەوحوستينگىسىندە. ءدال قازىر بارلىق الەۋمەتتىك جەلىدەگى Jibek Joly تەلەارناسىنىڭ رەسمي اككاۋنتتارىنا جازىلۋعا شاقىرامىن. وسىلايشا، 20- قاراشا كۇنى بولاتىن ماڭىزدى جاڭالىقتاردى وتكىزىپ المايسىزدار»، - دەيدى كونستانتين حارلاموۆ.
وسى كۇنى «قازاقپارات» ح ا ا رەداكسياسى دا تەلەارناداعى ارىپتەستەرمەن قويان-قولتىق جۇمىس ىستەيدى.
«20- قاراشادا اگەنتتىك تىلشىلەرى ماڭىزدى وقيعالاردىڭ ورتاسىندا جۇرەدى. Inform.kz رەسۋرسىندا ءاربىر وقىرمان سوڭعى جانە ەڭ سەنىمدى اقپاراتتى 5 تىلدە وقي الادى. بۇگىندە جۇرتشىلىقتىڭ اقپاراتتى الۋ تاسىلدەرى وزگەرگەنىن بايقاپ وتىرمىز. قازاقستاندىقتار رەسۋرسىمىزدىڭ موبيلدى نۇسقاسىن كوبىرەك پايدالانادى. وقىرماندارىمىزعا سايلاۋ تۋرالى بارلىق ماتەريال اگەنتتىكتىڭ الەۋمەتتىك جەلىلەردەگى جانە مەسسەندجەرلەردەگى اككاۋنتتارىندا دا قولجەتىمدى بولاتىندىعىن ايتقىم كەلەدى. بۇدان بولەك، 20- قاراشادا ءبىز Jibek Joly تەلەارناسىنداعى ارىپتەستەرىمىزدى قولداپ، جاڭارتىلعان ۇلتتىق تەلەارنادا تىكەلەي ەفيردە كورسەتىلگەن ەكسكليۋزيۆتى ماتەريالداردى بولىسەتىن بولامىز»، - دەيدى «قازاقپارات» ح ا ا باس رەداكتورى بيبينور تانەلبايەۆا.