ال جىلقىنىڭ باعاسى ءتىپتى جوعارى. دەگەنمەن قازاق ەت جەمەي وتىرا المايدى. سوعىمعا قازىر كوبىنە قانداي مالدى سويادى؟
كوكشەتاۋ قالاسىنىڭ ىرگەسىندەگى سادوۆىي اۋىلىندا تۇراتىن بەيسەنبەك زيناتبەك سوعىم سويۋ جىلدان جىلعا قيىنداپ بارا جاتقانىن ايتادى. سوزىنە سەنسەك، قوراسىندا مالى بار ادامداردىڭ وزىنە قازىر تۇتاس ءبىر باستى سويىپ الۋ وڭاي ەمەس. سەبەبى قالتانى قاعادى.
بەيسەنبەك زيناتبەك، سادوۆىي اۋىلىنىڭ تۇرعىنى:
- بۇرىن مىسالى، تايلار 250 مىڭنىڭ ماڭايىندا بولسا، بيىل 350-400-گە دەيىن بارىپ جاتىر. سوسىن وعان شاما كەلمەگەننەن كەيىن مىنە، سيىر سويىپ جاتىرمىز. قازاق نەگىزى جىلقى جەپ، جىلقىمەن جۇرگەن حالىق قوي. قول جەتپەي بارا جاتىر جىلدان جىلعا. بيىلعى سوعىم سيىر بولىپ جاتىر.
ءبىراق ءىرى قارانىڭ ءوزىن قولى جەتكەن سويادى. سەبەبى اۋىلدا كوتەرمە باعادا ءبىر سيىردىڭ تۇتاس ەتى كەلىسىنە 2 مىڭ تەڭگەدەن بولعانىمەن، بازارداعى باعا ودان كەمىندە 600 تەڭگەگە قىمبات. ال ورتا ەسەپپەن 150-200 كەلى ەت بەرەتىن مالدى تولىق ساتىپ الا سالۋعا ەكىنىڭ ءبىرىنىڭ شاماسى كەلمەيتىنىن ەسكەرسەك، جۇرت قالتاسىنا قاراي بازار جاعالايتىنى داۋسىز. ءبىراق مۇندا دا قازىر سوعىمعا دەگەن سۇرانىس تومەندەگەن.
باقىت ساتپايەۆا، ساتۋشى:
- ساتىپ الاتىن كىسىلەر وتە از. قارىزعا سۇرايدى. ءبىز ەندى وسى تۇرعىلىقتى بولعان سوڭ، كوپ كىسىلەردى بىلەمىز. سوندىقتان كوبىنە قارىزعا بەرەمىز. قازىر ساناپ الادى. بۇرىن 20-30 كەلى السا، ول كىسىلەر قازىر 5-6 كيلوگرام، 7 ك گ، كىشكەنە- كىشكەنە الادى. ويتكەنى كوكتەمدە عانا 3 مىڭ تەڭگەدەن بولعان جىلقى ەتى قازىر بازاردا 3500 تەڭگەدەن ساتىلىپ جاتىر.
ال 20 جىلدان بەرى قاساپشىلىقپەن اينالىساتىن ەركىن ءابدراحمانوۆ: «ەتتى فەرمەرلەردىڭ وزىنەن تىكەلەي كوتەرمە باعادا كوپتەپ ساتىپ العان الدەقايدا ءتيىمدى»، - دەپ وتىر.
ەركىن ءابدراحمانوۆ، قاساپشى:
- بازارلاردا مىسالى، ەتتىڭ باعاسىن 3500-دەن ساتىپ الساڭ، ال، مىنا جەردە تۇتاس الساڭ، وندا شامامەن 2700-2800 تەڭگەدەن شىعىپ تۇرادى. كوبى تۇسىنبەيدى. ال بىلاي جالپىلاي السا، وندا ارزانداۋ تۇسەدى. ال مالدىڭ باعاسى الداعى ۋاقىتتا قىمباتتاماسا، ارزاندامايتىن سەكىلدى. سەبەبى، قىستىڭ قاقاعان ايازىندا ءتورت تۇلىكتى قورادا ۇستاۋ شارۋالارعا وڭاي ەمەس. ويتكەنى جەم- ءشوپ قىمبات، كۇتىمى دە كۇشتى. سوندىقتان مال ۇستايتىندار دا جىلدان جىلعا ازايىپ بارادى.
www.24.kz